
“ፋኖ ኮዙን(አላማውን) ተነጥቋል፤ አካሄዱ ‘ከአፈርኩ አይመልሰኝ’ ነው ” ሲሉ የቀድሞው የፋኖ አመራር ማርእሸት ፀሀዩ በኤንቢሲ ኢትዮጵያ “ጊዜ ግስ” ፕሮግራም ላይ ባደረጉት ቃለ-መጠይቅ ገልጸዋል።
በአማራ ክልል እየተካሄደ ያለው ትጥቅ መሰረት ያደረገው እንቅስቃሴ ተቋማዊ ቅርጽ የያዘና ስነ-ስርዓት ያለው የትግል መልክ እንደሌለው በመግለፅ ትግሉ እንደ ሜጫ፣ ዳሞት፣ ጎጃም፣ ደቡብ ጎንደር፣ ስማዳ እና ሰሜን ሸዋ ባሉ አካባቢዎች “በጎበዝ አለቆች እና በጉልተኛ” የጦር አበጋዞች የተሞላ ነው ሲሉ ተናግረዋል ።
ፋኖ የሎጂስቲክስ እጥረት አለበት ያሉት አቶ ማርእሸት በትጥቅ ትግሉ ሂደት ውስጥ ከውጭ የሚደረግላቸው ድጋፍ እጅግ ውስንና የተዛባ መሆኑን አንስተዋል። ለአብነትም ከዚህ በፊት ከግብጽ የተላከው 20 ሚሊዮን ብር ለታጣቂ ቡድኖች ሲከፋፈል ፍትሃዊ እንዳልነበር እና አብዛኛው ሀብት በሻዕቢያ እጅ እንደቀረ ጠቁመዋል።

አክለውም የፋኖ ታጣቂዎች በቂ ጥይት እና የጦር መሳሪያ ሳይኖራቸው ለረጅም ወራት ቢዋጉ እንኳን መደበኛ ጦርነትን አሸንፈው መውጣት ፈጽሞ እንደማይችሉ አስረድተዋል።
አቶ ማርእሸት በቃለ-መጠይቁ መንግስትን መቃወም እንደ ባህል፣ ጀግንነትና ስኬት የሚቆጥሩ የውስጥ ካድሬዎች እና የውጭ ስብስቦች እንዳሉም አጋልጠዋል።
ጦርነቱ በአካባቢው ማህበረሰብ ላይ ከፍተኛ ሰብአዊ እና ኢኮኖሚያዊ ቀውስ እየፈጠረ መሆኑን ጠቅሰው፤ ማዳበሪያ ማግኘት ያልቻለው አርሶ አደር እና ትምህርታቸው ለሶስትና አራት ዓመታት የተቋረጠባቸው ህጻናት ትልቅ አደጋ ላይ መሆናቸውን ተናግረዋል።
አመራሩም በአባልነት በቆዩባቸው አመታት የእነዚህ አይነትና መሰል ችግሮች ሰለባ እንደነበሩ በማስረዳት የአማራ ልሂቅ ራሱን በሐቀኝነት ሊመረምር እንደሚገባ አሳስበው፤ ከዚህ ቀደም የሰሯቸውን ስህተቶች በመገምገም፣ ለክልሉ ሰላም እና መረጋጋት ሲባል ተቋማዊ በሆነ መንገድ በንግግር እና በሰላማዊ አማራጮች ላይ እንዲመክሩ ጥሪ አቅርበዋል።
በ-ታደለ ገበየሁ












