፨ ፨ ፨ ፨ ፨ ፨ ፨ ፨ ፨ ፨
6ኛው የኢፌዴሪ የሕዝብ ተወካዮች ምክር ቤት በ3ኛው ዓመት የሥራ ዘመኑ (2016 ዓ.ም) በአከናወናቸው ቁልፍ ሕገ መንግስታዊ ተግባራት፤ በሕግ አወጣጥ፣ በክትትልና ቁጥጥር እና በውክልና ሥራዎች ለማህበራዊ ፣ ለኢኮኖሚ ልማት መስፋፋት፣ ለሀገር ሠላምና ለዜጎች ብልፅግና መረጋገጥ መሠረት ናቸው የተባሉ ጉዳዮችን በጥልቀት መርምሮ ውሳኔዎችን በማስተላለፍ ተግባራዊ እንዲሆኑ አድርጓል፡፡
በፓርላማ ዲፕሎማሲ መስክም የሀገሪቱን የውጭ ጉዳይ መርሆች በመከተል የሀገራችንን እውነተኛ ገፅታ ለውጭው ዓለም ለማስተዋወቅና የኢኮኖሚ ዲፕሎማሲውን ለመደገፍ የሚያስችሉ ውጤታማ ውሳኔዋችን አሳልፏል፡፡
6ኛው የኢፌዴሪ የሕዝብ ተወካዮች ምክር ቤት 3ኛው ዓመት የሥራ ዘመኑን አጠናቆ እነሆ በ2017 ዓ.ም አዲስ ዓመት 4ኛ ዓመት የሥራ ዘመኑን በይፋ ለመጀመር በዝግጅት ላይ ይገኛል፡፡
ምክር ቤቱ ባሳለፋቸው የሥራ ዘመናት ያስመዘገባቸውን መልካም ውጤቶችና ያሉ ምርጥ ተሞክሮዎችን በማስቀጠል በ2017 አዲስ ዓመት የሕዝብ የልማትና የመልካም አስተዳደር ጥያቄዎች ይበልጥ ምላሽ እንዲያገኙ ፣ የዜጎች የኑሮ ደረጃ እንዲሻሻል፣ ለሕዝቦች አብሮነት እና ዘላቂ ሰላም ፣ ለሀገር አንድነትና ሉዑላዊነት መፅናት ሕገ መንግስታዊ ተልዕኮውን በትጋትና በቁርጠኝነት የሚወጣ ይሆናል፡፡
በውስጣችን ያሉ ማንቸውንም ልዩነቶች በሰለጠነ የፖለቲካ ባህል በምክክርና ውይይት ለመሻገር የተጀመረውን የሀገራዊ ምክክር መሳካትም ተስፋ ሰጪ ውጤቶች እየተመዘገቡ ናቸው፡፡
የሀገራዊ ምክክሩ ሙሉ የትግበራ ሂደት እንዲሳካ ምክር ቤቱ ለምክክር ኮሚሽኑ የሚያደርገው ድጋፍና ክትትል አጠናክሮ የሚቀጥል ሲሆን የሕዝብ አብሮነትን፤ የሀገር አንድነትንና ሉዑላዊነትን የሚፈታተኑ ከፋፋይ ትርክቶችን አምርረን በመታገል ለሀገራዊ ምክክሩ መሳካት ሁላችንም የበኩላችንን ድርሻ እንድንወጣ በዚህ አጋጣሚ የሕዝብ ተወካዮች ምክር ቤት ጥሪውን ያስተላልፋል።
2017 አዲስ ዓመት የሠላም፣ የጤና፣ የአብሮነት፣ የብልፅግና ዘመን እንዲሆንልን እየተመኘን ኢትዮጵያዊያንና ትውልደ ኢትዮጵያዊያን ለሀገር ሠላም፣ ልማት፣ ብሔራዊ ጥቅምና ክብር በጋራ ሆነን በአንድነት እንድንቆም ምክር ቤቱ ጥሪውን ያስተላልፋል፡፡
አሮጌውን ዓመት ሸኝተን አዲሱን 2017 ዓ.ም ስንቀበልም ጥላቻና ቂምን አራግፈን ለፍቅር፣ ለይቅር-ባይነት፣ ለአብሮነትና መቻቻል ልባችንን ከፍተን፤ እንደ ግለሰብ፣ እንደ ማህበረሰብም ሆነ እንደ ሀገር ለውጥና ብልፅግና ለማምጣት ታላቅ ተስፋንና ዝግጁነትን አንግበን ሊሆን ይገባል፡፡
በዓሉን ስናከብርም የእኛን ድጋፍ የሚሹ አቅመ ደካሞችንና ያጡ የተቸገሩ ወገኖችን በማሰብና በመርዳት በአብሮነት ስሜት ሊሆን ይገባል፡፡












