በሰር ጂም ራትክሊፍ ከፊል ባለቤትነት ስር ከተያዘ በኋላ በርካታ ለውጦችን እያደረገ የሚገኘው ማንችስተር ዩናይትድ ታሪካዊውን ኦልድ ትራፎርድ ስታዲየም በአዲስ መልኩ ለመገንባት ማቀዱ ይታወሳል።
እስከ 100ሺ ደጋፊዎችን የማስተናገድ አቅም ይኖረዋል የተባለው አዲሱ ስታዲየም በአውሮፓውያኑ 2035 የሚደረገውን የሴቶች አለም ዋንጫ እንዲደረግበት ማንችስተር ዩናይትድ ፍላጎቱን አሳይቷል።
ፊፋ የ2035ቱን የሴቶች አለም ዋንጫ በ4 የእንግሊዝ ከተሞች ለማካሄድ የወሰነ ሲሆን፣ማንችስተር ከተማ አንዷ ናት ተብሏል። የማንችስተር ዩናይትድ አዲሱ ኦል ትራፎርድ ስታዲየም የግንባታ ሂደት እስካሁን ያልተጀመረ ቢሆንም፣በመጪው 6 አመት ጊዜ ውስጥ ይጠናቀቃል ተብሎ ዕቅድ ተይዟል።
የክለቡ ዋና ስራ አስፈጻሚ ኦማር ቤራዳ በአውሮፓውያኑ 2028 የወንዶች እና የሴቶች ቡድንን የፕሪምየር ሊግ ዋንጫ ባለድል የማድረግ ዕቅዳቸውን በቅርቡ ይፋ ማድረጋቸው ይታወሳል።
ማንችስተር ዩንይትድን በሜዳ ላይ እና ከሜዳ ውጪ ተጽዕኖውን ይበልጥ ለማሳደግ እየተሰራ ሲሆን፣የ2035ቱን የሴቶች አለም ዋንጫ ማስተናገድ የክለቡን ብራንድ ለማስተዋወቅ ከተያዘው ዕቅድ አንዱ መሆኑ ተመላክቷል።
በ-አልፈሪድ ነስሮ












