
አቶ ጌታቸው ረዳ የኤርትራ ሕዝብ፣ የሀገሪቱን ሉዓላዊነት ይዘው ወደ መቃብር እየወሰዷት ካሉት ከፕሬዝዳንት ኢሳያስ አፈወርቂ በላይ ሌላ ጠላት እንደሌለው ተናገሩ።
በኤንቢሲ ኢትዮጵያ ቴሌቪዥን ‘ጊዜ ግስ’ መርሐ-ግብር ላይ ቆይታቸውን ያደረጉት የጠቅላይ ሚኒስትሩ የምሥራቅ አፍሪካ አማካሪ ጌታቸው ረዳ፣ ስለ አፍሪካ ቀንድ ጂኦፖለቲካ፣ ስለ ኤርትራ መንግሥት የውስጥ ውድቀት እና ስለ ቀጠናዊ የጥፋት ኃይሎች መዳከም ዝርዝር ትንታኔ ሰጥተዋል።
አቶ ጌታቸው እንደገለጹት የአፍሪካ ቀንድ በዓለም ላይ እጅግ ተለዋዋጭ ከሆኑ እና ግጭቶች በተደጋጋሚ ከሚከሰቱባቸው ቀጠናዎች አንዱ ነው። በተለይም ኢትዮጵያ የምትገኝበት የቀይ ባህር አካባቢ እና የዓባይ ተፋሰስ መነሻነት ለቀጠናው ፖለቲካዊ ብሎም ኢኮኖሚያዊ እንቅስቃሴዎች ከፍተኛ ትኩረት እንዲሰጠው አድርጓል ነው ያሉት።
በአካባቢው የሚነሱ ቀውሶች በኢትዮጵያ የውስጥ ሰላም ላይ ቀጥተኛ ተጽዕኖ እንደሚያሳድሩ አማካሪው አብራርተዋል። ለአብነትም በሱዳን የተረጋጋ ሰላም እንዲፈጠር ግብጽ ፍላጎት እንደሌላት ጠቁመው፤ ይህም በቀጠናው ላይ የሚፈጥረውን ጫና ተገንዝቦ ጠንካራ የውስጥ ዝግጅት ማድረግ እንደሚገባ አሳስበዋል።

አክለውም የኤርትራ ፕሬዚዳንት ሀገራቸውን ኤርፖርት፣ መንገድና ፋብሪካ የሌላት ተራ ቦታ አድርገዋታል ሲሉ ገልፀዋል። የሚመሩት መንግስት በተለያዩ መንገዶች የሚያገኘውን ገንዘብ ለኤርትራ ሕዝብ ልማትና ግንባታ ከማዋል ይልቅ፣ ጎረቤት ሀገራትን ለማተራመስ እያዋለው መሆኑንም አጋልጠዋል።
የኤርትራ መንግሥት ራሱ በወጠናቸው እና እርስ በርሳቸው በሚቃረኑ እቅዶች ምክንያት የመፍረስ ዕድሉ እጅግ ሰፊ መሆኑን አቶ ጌታቸው ገልጸው የኢትዮጵያ መከላከያ ታንኮች አስመራ ድረስ መግባት ሳያስፈልጋቸው ሥርዓቱ በራሱ ውስጣዊ ድክመት የሚወድቅበት እድል ሰፊ መሆኑን አስረድተዋል።
በተጨማሪም የኤርትራ መንግሥት ከስህተቱ የመማር አቅሙ እጅግ ዝቅተኛ መሆኑን በመግለጽ ሥርዓቱ አሁንም ‘’የውጭ ኃይሎች ይረዱኛል’’ በሚል የተሳሳተ ስሌት ውስጥ ገብቷል ብለዋል:: ቢሆንም ግን የለኮሰውን እሳት ብቻውን ይቃጠለዋል እንጂ ማንም የሚደርስለት ኃይል አይኖርም በማለት አጽንኦት ሰጥተው ነው የተናገሩት።
“ለኤርትራ አፋሮች ከአስመራ ይልቅ ሰመራ ይቀርባል” ሲሉ የገለጹት አቶ ጌታቸው በኢትዮጵያ እንዲሁም በኤርትራ አፋሮች መካከል ያለውን ጥብቅ ማህበራዊ ትስስር ጠቅሰው፥ የኤርትራ መሪዎች ሕዝቦችን ለያይተው የመግዛት አቅማቸው መዳከሙን አመላክተዋል።
በሌላ በኩል ህብረት ፈጥረው የነበሩ የህወሃት እና የሌሎች የጥፋት ኃይሎች እንቅስቃሴ በውስጣዊ ቅራኔዎች የተሞላ በመሆኑ የህዝብ ድጋፍ በማጣት መፍረሱን አቶ ጌታቸው ገልጸዋል። የሽብር ቡድኑ አመራሮች የሽብር ተግባር ለመፈጸም ጥሪ ቢያደርጉም፣ ስጋት የመሆን አቅም የላቸውም ነው ያሉት።
አሁን ላይ አብዛኞቹ የአመራር አባላት እጅ እየሰጡ መሆናቸውን ጠቁመው፥ የቀሩትም ሾልከው የሚወጡበትን መንገድ እየፈለጉ መሆናቸውን ተናግረዋል። በአንጻሩ የኢትዮጵያ መከላከያ ሰራዊት እጅግ የላቀ ዲሲፕሊን እያሳየ መሆኑን አቶ ጌታቸው አድንቀዋል።
በተመሳሳይ ለዳያስፖራው ማህበረሰብ ባስተላለፉት ጥሪ፥ ከነባራዊው እውነታ ጋር በመታረቅ በራሳቸው ቅራኔ ለፈረሱ የጥፋት ኃይሎች ገንዘብ፣ ጊዜና ጉልበት ማባከናቸውን እንዲያቆሙ መክረዋል። በሀገር ውስጥ ያሉ ማናቸውም ጥያቄዎች ካሉ ከፌዴራል መንግሥቱ ጋር በሰላማዊና በሕጋዊ መንገድ ብቻ መነጋገር እንደሚገባም አሳስበዋል።
የአብስራ ተፈራ












