ለሥልጣን ፍላጎት ሲባል የሕዝብን ሕይወት፣ የወጣቶችን ዕጣ ፈንታና የሀገርን ሰላም ለአደጋ ማጋለጥ ምን ያህል ዋጋ ያስከፍላል? በህወሓት በተሳሳተ የጦርነት ስሌት፣ የጋራ ዓላማ የሌለው ጥምረት እና በአመራሩ ስሕተቶች እንዲሁም ራስ ወዳድነት ሳቢያ በሕዝቡ ላይ የደረሰው ጉዳት ከፍተኛ ነው። በመከላከያ ሚዲያና ኮሚዩኒኬሽን ተዘጋጅቶ የቀረበው «ከሃዲዎቹ ምርኮኞች» የተሰኘው ዘጋቢ ፊልም ፤ ይህንን እውነታ በምርኮኛ ጀኔራሎችና ወጣቶች ምስክርነት አጋልጦታል።

እንደ ሜጀር ጄነራል ዮሐንስ ወልደጊዮርጊስ (ጆን መዲድ) ገለጻ፣ ህወሓት ከሻዕቢያና ከፋኖ ጋር አደረኩኝ ያለው ጥምረት በጋራ ዓላማና በተቀናጀ የጦርነት ስትራቴጂ ላይ የተመሠረተ እንዳልነበረ ጠቅሰው፣ ይልቁንም ኃይሎቹ በአንድ የጋራ ዓላማ ሳይሆን በየራሳቸው ጠባብ ፍላጎት ይንቀሳቀሱ እንደነበር ጠቁመዋል። በጥምረቱ ውጤታማነት ላይ ከመጀመሪያውም ጥርጣሬ እንደነበራቸው የተናገሩት ሌላኛው ከፍተኛ አመራር፣ በወቅቱ የነበራቸው ስጋት አሁን ትክክል ሁኖ እንዳገኙት ተናግረዋል።

ከፋኖ ጋር በተያያዘ ከተሰጣቸው መረጃና በተግባር ባዩት እውነታ መካከል ሰፊ ልዩነት እንደነበር ከፍተኛ መኮነኑ አስታውሰው፣ ፋኖ በግንባር ላይ እንዳለና ከላሊበላ በኩል የሚመጣውን ኃይል እንደሚከላከል ቢነገራቸውም በተግባር ግን የተነገራቸውን ድጋፍ እንዳላገኙ አስታውሰዋል። ይህም በጥምረቱ ውስጥ የመተማመንና የቅንጅት አለመኖር ማሳያ እንደሆነ ጠቅሰዋል።

ስለውጊያው አጀማመር ጀነራል ጆን መዲድ ሲያስረዱ፣ የተጀመረው በጥምረቱ የጋራ እቅድ ቢሆንም፣ ከሦስት ቀናት በኃላ የኢትዮጵያ መከላከያ ሠራዊት ባደረገው የጸረ-ማጥቃት እርምጃ (በምዕራብ ትግራይ፣ በሰሜን ምዕራብ እና በሰቆጣ ግንባሮች) ህወሓት መቋቋም አቅቶት በአጭር ጊዜ ዉስጥ ወደ ድንበር ፈርጥጠዋል ነው ያሉት።

አመራሮቹ የጦር ሜዳን ሁኔታ በበቂ ሁኔታ ሳያጠኑ ወደ ጦርነት እንደገቡና በመጨረሻም ሠራዊቱን ወደ ኤርትራ ለማሻገር እንደወሰኑ ጆን መዲድ አስታውሰው፣ አንዳንድ አዛዦችም ለሠራዊቱ ትዕዛዝ ሳይሰጡ በመከላከያ ከበባ ውስጥ እንዳለ ትተውት መሸሻቸውን ተናግረዋል።

የህወሓት አመራር ውሳኔዎችን የሚያሳልፈው በተጨባጭ መሬት ላይ ባሉ ሁኔታዎች ላይ ተመሥርቶ ሳይሆን በስሜታዊነት ብቻ እንደሆነ ልፀው፣ የራሳቸውን የአመራር ድክመት ለመሸፈንም በሌሎች ሰዎች ላይ እንደሚያላክኩ አስታዉሰዋል።

እንደ ጀነራሉ ገለጻ፣ ጦርነቱ የተጀመረው ያለ በቂ ዝግጅትና ባልተመጣጠነ የኃይል ሚዛን ሲሆን፣ በተለይም የፅንፈኛው ፖለቲካዊ እና ወታደራዊ አመራሮች በኃይል ፍላጎታቸውን ማሳካት እንደሚችሉና ሥርዓቱን መገርሰስ ባይችሉ እንኳ በተሻለ ቁመና ላይ ሁነው መደራደር እንደሚችሉ በማስላት ወደ ጦርነት መግባታቸውን ተናግረዋል። እንዲሁም ይህንን የተቃወሙ አመራሮች አባላትን ሃሳባቸውን በነጻነት እንዳይገልጹ እንደሚያፍናቸው ያስታዉሳሉ።

በመከላከያ ሰራዊት የተማረኩት እንደሚሉት፣ በስሜታዊነት፣ በተሳሳተ የጦርነት ስሌትና በጠባብ የሥልጣን ፍላጎት ላይ ተመሥርቶ የሚወሰድ ማንኛውም እርምጃ መጨረሻው ውድቀትና ኪሳራ መሆኑን ገልፀው፣ ያለ በቂ ዝግጅትና ቅንጅት የሚደረግ ጥምረት፣ እንዲሁም የውስጥ ሐሳብን በማፈን የሚወሰን ኃላፊነት የጎደለው ውሳኔ፣ ሕዝብን ለከፋ ሰቆቃና ወጣቶችን ለአላስፈላጊ መስዋዕትነት እንደሚዳርግ ተናግረዋል።በመጨረሻም ጦርነት አብቅቶ የወደሙ መሠረተ ልማቶች እንዲጠገኑና ወጣቱ ወደ ልማት እንዲመለስ ጥሪያቸውን አቅርበዋል።













