በኤንቢሲ ኢትዮጵያ ሳምንታዊ“የኢዲተሮች ጠረጴዛ” ፕሮግራም ላይ በሚዲያ ሚና እና በብሔራዊ ጥቅም ዙሪያ ሰፊ ውይይት ተደረገ።
በውይይቱ ተሳታፊ የነበሩት የአራዳ ኤፍ ኤም ዋና አዘጋጅ ጋዜጠኛ ኤልያስ ተክለወልድ እና የከፍተኛ ትምህርት ተቋማት የሰላምና ደህንነት መምህር አሌክስ ብርሃኑ ሚዲያና ብሄራዊ ጥቅምን በተመለከተ በርካታ ሀሳቦችን አንስተዋል።

የሰላም ሚኒስቴር ከኤንቢሲ ኢትዮጵያ ጋር በመተባበር ያዘጋጁት ይህ መርሃ-ግብር በተለይም ሀገራዊ ህልውናን፣ የዜጎችን የወደፊት እጣፈንታ እና ሚዲያዎች የሀገርን ዘላቂ ጥቅም ለማስከበር የሚጫወቱትን ቁልፍ ሚና ማዕከል ያደረገ ነበር።
በመድረኩ ላይ አስተያየታቸውን የሰጡት ጋዜጠኛ ኤልያስ ተክለወልድ እንደገለጹት፤ የአንድ ሀገር ብሔራዊ ጥቅም መሰረቱ የሀገርን ዳር ድንበር፣ የአየር ክልልን እና የግዛት አንድነትን በጽናት ማስጠበቅ ነው።
ሀገራዊ ሉዓላዊነትና ዳር ድንበርን መጠበቅ ለብሔራዊ ደህንነት የመጀመሪያውና ዋናው አጥር መሆኑን ያመለከቱት ጋዜጠኛው፣ ሚዲያዎች በዚህ ረገድ የህዝብ ንቅናቄ የመፍጠርና ሀገራዊ አንድነትን የማጠናከር ከፍተኛ ኃላፊነት እንዳለባቸው አስረድተዋል።

የሰላምና ደህንነት መምህሩ አሌክስ ብርሃኑ በበኩላቸው፣ ብሔራዊ ጥቅም ከግዛት አንድነት ባለፈ የዜጎችን አሁናዊ ማንነትና የወደፊት እጣፈንታ ከማስተካከል ጋር ጥብቅ ቁርኝት እንዳለው አብራርተዋል።

የዜጎች ህልውና፣ የሀገር ህልውና እና የራሳቸው የሚዲያዎች ህልውና ሙሉ በሙሉ የሚወሰነው ብሔራዊ ጥቅምን በማረጋገጥ ላይ እንደሆነም ጠቁመዋል።
አክለውም ኢትዮጵያ በአሁኑ ወቅት ለወደብ ኪራይ በየአመቱ እስከ 2 ቢሊዮን ዶላር የምታወጣ መሆኗን በማንሳት፣ የባህር በርና የወደብ ጥያቄ የሀገርን ምጣኔ ሀብትና የወደፊት እጣፈንታ ከመወሰን አንጻር ምን ያህል ወሳኝ እንደሆነ ነው የጠቀሱት።
”ነፃነት ሁልጊዜም ከከፍተኛ ኃላፊነት ጋር የሚሄድ መሆኑን መገንዘብ ያስፈልጋል፤ የመገናኛ ብዙሃን የመናገርና የመዘገብ ነፃነታቸውን ሲጠቀሙ፣ ከጀርባው ያለውን ሀገራዊ ኃላፊነትና የብሔራዊ ጥቅም ማስከበር ድርሻ በተገቢው መንገድ መሸከም ይኖርባቸዋል” ብለዋል ።
ሚዲያዎች ሀገራዊ አጀንዳዎችን ለመቅረፅ፣ የህዝብን ሰላምና ደህንነት ለማረጋገጥ እንዲሁም የሀገርን ታሪካዊና ምጣኔ ሀብታዊ ጥቅሞች ላይ በጋራ በመቆም ያላቸው ሚና ሊተካ የማይችል መሆኑን በዝርዝር አብራርተዋል።
ሀገርና ሚዲያ የማይለያይ ህልውና ያላቸው በመሆናቸው፣ ሀገራዊ ጥቅሞችን በሚነኩ ማንኛውም ጉዳዮች ላይ ሚዲያዎች የጋራ አቋም በመያዝ የሀገርን ጥቅም ማስከበር እንዳለባቸው ተወያዮቹ ተናግረዋል።
በ ታደለ ገበየሁ












