በጋዛ እየተካሄደ ባለው ተከታታይ ጦርነት በረሃብ የሚሞቱ ሰዎች ቁጥር በእጅጉ እየጨመረ መምጣቱን የጤና ባለስልጣናት አስታውቀዋል ።
ትናንት ብቻ አራት ህጻናትን ጨምሮ ቢያንስ 15 ፍልስጤማውያን በረሃብ ህይወታቸውን ማጣታቸው ተገልጿል። በዚህም በእስራኤል እና ፍልስጤም መካከል ጦርነት ከጀመረ ወዲህ በምግብ እጥረት የሞቱ ሰዎች ቁጥር 101 መድረሱ ተመላክቷል። ከማቾቹ መካከል አብዛኞቹ ህጻናት መሆናቸው የወጡ መረጃዎች ሲጠቁሙ ይበልጥ ስጋትን ጨምሯል።
ይህ አስደንጋጭ መረጃ የመጣው የእስራኤል ኃይሎች በጋዛ ላይ ከፍተኛ የቦምብ ድብደባ ማድረጋቸውን በቀጠሉበት ወቅት ነው። ማክሰኞ ዕለት ብቻ የእስራኤል ጦር በጋዛ ሰርጥ አከባቢ ባደረሰው ጥቃት ቢያንስ 81 ሰዎች መገደላቸው ተገልጿል ።
ተባብሶ በቀጠለው ግጭት ምክንያት በጋዛ የምግብ እጥረት እንዲከሰት እያደረገ ይገኛል ። የተባበሩት መንግስታት ድርጅት በቀጠናው ያለው ሁኔታ “ከቅርብ ጊዜ ወዲህ ታይቶ የማይታወቅ የሞትና የጥፋት ደረጃ ያለው አስፈሪ ትዕይንት” ሲል ገልጾታል።
የጋዛ ከተማ የአል-ሺፋ ሆስፒታል ኃላፊ እንደተናገሩት፣ ባለፉት ሶስት ቀናት ውስጥ በመላው የፍልስጤም ግዛት 21 ህጻናት በምግብ እጥረት እና በረሃብ ምክንያት ህይወታቸውን አጥተዋል ሲሉ ተናግረዋል ።
ከተለያዩ የጤና ባለሥልጣናት እና የሰብዓዊ ዕርዳታ ድርጅቶች የተገኙ ሪፖርቶች እጅግ አሳሳቢ እና በፍጥነት እየተባባሰ የመጣ የረሃብ ቀውስ መኖሩን ያመለክታሉ። በግምት 600ሺ ሰዎች፣ 60 ሺ ነፍሰ ጡር ሴቶችን ጨምሮ በምግብ እጥረት እየተሰቃዩ መሆናቸውን እነዚህ ድርጅቶች በሪፖርቶቻቸው አመላክተዋል።
የተባበሩት መንግስታት የሰብዓዊ መብቶች ጽህፈት ቤት በበኩሉ፤ ከግንቦት ወዲህ ወደ እርዳታ ማከፋፋያ ማእከላት ተጉዘው ምግብ ለማግኘት ሲሞክሩ የነበሩ ከ 1 ሺ በላይ ፍልስጤማውን በእስራኤል ኃይሎች መገደላቸውን አስታውቋል ።
በአሁን ሰዓት በጋዛ ያለው የሰብአዊ ሁኔታ እጅግ አሳሳቢ እንደሆነ የተገለፀ ሲሆን፣ እስራኤል በአከባቢው እያደረገች ያለችውን የጦርነት ዘመቻ በአፋጣኝ ካላቆመች ከባድ ሰብአዊ ቀውስ ሊፈጠር እንደሚችል ተሰግቷል ።
ዘገባው የአልጀዚራ ነው
በ ሰላማዊት ወልደገሪማ












