፨ ፨ ፨ ፨ ፨
አዲስ አበባ | ሐምሌ 29 2016| NBC ETHIOPIA-በየደረጃው ያሉ የአማራ ክልል ከተማ ልማት ዘርፍ ተቋማት በማክሮ ኢኮኖሚ የትኩረት ጉዳዮች ዙሪያ እየመከሩ ነው።
በምክክር መድረኩ ላይ የተገኙት ርዕሰ መስተዳድር አረጋ ከበደ የሥራ እድል ፈጠራ እና የኑሮ ውድነትን መቀነስ የበጀት ዓመቱ የትኩረት መስክ ናቸው ብለዋል።
የስራ እድል ፈጠራም ሆነ የኑሮ ውድነት ቅነሳ ስለምንመኘው ብቻ የሚመጣ አይደለም ያሉት ርዕሰ መስተዳድሩ የመሪነት ሚናችን እና የሕዝብ ተቆርቋሪነታችን የሚገለጥበት ብርቱ ጥረትን ይጠይቃል ነው ያሉት። በተለይም የፖለቲካ መሪው ሊመራበት ይገባል ያሉትን የሥራ መርህ በዝርዝር አስቀምጠዋል
መሪነታችሁ ከግብረ ገብነት እና ከሥነ ምግባር የመነጨ ሊሆን ይገባል ያሉት ርዕሰ መስተዳድሩ ቅቡል ባሕሪ እስካለን ድረስ የምንመራው ሕዝብ የነገርነውን የሚሰማ እና ለተግባራዊነቱም የሚተባበር ይሆናል ብለዋል።

ርዕሰ መስተዳድሩ በንግግራቸው የፖለቲካ አመራሩ ቁርጠኛ፣ ታታሪ እና ለሕዝብ ጥቅም የሚቆረቆር መሆን እንዳለበት ጠቁመው “እንደ መሪ በየደረጃው ያለን አመራሮች በክልላችን ጉዳይ ኃላፊነት መውሰድ አለብን” ነው ያሉት። ለሚፈጠር ችግር ባለቤት ከመፈለግ እና በድህረ ችግር ትንታኔ ከመጠመድ ወጥቶ በኀላፊነት መሥራት እንደሚገባ ጠቁመዋል።
የክልሉ መሠረታዊ ችግሮች የሚመነጩት ከምጣኔ ሃብታዊ ችግሮች ነው። ምጣኔ ሃብታዊ ችግሮቻችን ለመሻገር ሃብት መፍጠር ያስፈልጋል ያሉት ርእሰ መሥተዳድሩ ንግድ፣ ትራንስፖርት፣ ቱሪዝም እና ቴክኖሎጂን ማቀናጀት ያስፈልጋል ብለዋል። ገቢ የመሰብሰብ ጉዳይም በቀጣይ ዓመት በትኩረት የሚፈጸም ጉዳያችን ነው ብለዋል።
ሃብት ከማሰባሰብ ባሻገር ከእለት ፍጆታ የተሻገረ ሃብት ማከማቸት ላይ አቅዶ መሥራት እንደሚያስፈልግም አንስተዋል። ከገጠር ወደ ከተማ የሚደረግ ፍልሰትን እና የከተሞችን መስፋፋት (ክትመትን) በአግባቡ መምራት ይኖርብናል ያሉት ርዕሰ መስተዳደሩ፤ የተገራ እና መጻዒውን ጊዜ ታሳቢ ያደረገ ክትመትን አውን እናድርግ ብለዋል።
ሰላም እና ጸጥታን ማስከበር ሌላው ትኩረት መሰጠት ያለበት ጉዳይ እንደሆነም አንስተዋል። በቀጣይ ጊዜያት ለአመራሩ አፈጻጸም ላይ የተመሠረተ ተጠያቂነት እና እውቅና እንደሚኖርም አንስተዋል። የሥራ እድል ፈጠራ እና ድህነት ቅነሳ ደግሞ አመራሩ የሚለካባቸው ቁልፍ ጉዳዮች ስለመሆናቸው ማንሳታቸውን አሚኮ ዘግቧል።
📌YouTube – https://www.youtube.com/@NBCEthiopiaSC
📌 TikTok – https://www.tiktok.com/@nbcethiopia
📌Website – https://nbcethiopia.com/news/
📌Facebook -https://www.facebook.com/ethiopiannbc
#NBC_ETHIOPIA
#ሆኖ_መገኘት












