፨ ፨ ፨ ፨ ፨ ፨
አዲስ አበባ | ሐምሌ 27 2016| NBC ETHIOPIA-የውጭ ምንዛሬ በገበያ ሳይወሰን መቆየቱ ሃገሪቱን ለንግድ እና ለታክስ ስርዓት መዛባት እና መዘዞቻቸው ሲዳርጓት መቆየታቸውን የገንዘብ ሚኒስትሩ አህመድ ሽዴ ገልፀዋል።
በጥቁር ገበያውና በመደበኛው ምንዛሬ መካከል ያለው ልዩነት የውጭ ባለሃብቶች መዋዕለ ንዋያቸውን አፍሰው እንዳይሰሩ እንቅፋት ሲፈጥር ነበር ያሉት ሚኒስትሩ፡፡
የውጭ ኢንቨስትመንትን ለመሳብ፣ የግሉን ባለሃብት ሚና ለማሳደግ፣ የዕዳ ጫና ለመቀነስ፣ ኢኮኖሚውን ተወዳዳሪ ለማድረግ እና የሃገሪቱን ዕድገት ለማስቀጠል የተሟላ የማክሮ ኢኮኖሚ ማሻሻያው የግድ እንደሚል ተናግረዋል።
የማክሮ ኢኮኖሚ ማሻሻያው መንግስት ባለፉት ስድስት አመታት ሲያደርገው የቆየው የኢኮኖሚ ሪፎርም አካል መሆኑን የገለፁት ሚኒስትሩ የውጭ ምንዛሬ ተመንን ለገበያ የመተው ጉዳይ የሪፎርሙ አንድ አካል መሆኑን በማብራራት ሌሎች ማሻሻያዎች እንደሚኖሩ ጠቁመዋል።
ዘመናዊ የንግድና የባንክ ስርዓት ለመገንባት ያግዛል የተባለው ማሻሻያው በየዓመቱም ከግብር ከፋዩ የሚሰበሰበው ገንዘብ በ1% እንዲጨምር ማድረግ አንዱ ዕቅዱ ነው ተብሏል።
የማክሮ ኢኮኖሚ ማሻሻያው በመጀመሪያው አመት ከፍተኛ ጫና ይኖረዋል ያሉት ሚኒስትሩ አህመድ ዓላማውን ያሳካ ዘንድ ምርትን በአግባቡ ማምረትና ገቢን በአግባቡ መሰብሰብ እንደሚያስፈልግ አፅንኦት ሰጥተዋል።
የገቢ አሰባሰቡን ለማሳደግ የገቢዎች ሚኒስቴር እና የጉምሩክ ኮሚሽን አቅም ለማሳደግ እቅድ መያዙ ተነግሯል።
የገቢዎች ሚኒስቴር በ2017 በጀት አመት ከ342 ቢሊየን ብር በላይ ለመሰብሰብ እቅድ ይዟል።
ሚኒስቴሩ ከከፍተኛ ግብር ከፋዮች ጋር በታክስ ህግ ተገዢነት ዙሪያ ዓመታዊውን የውይይት መድረክ በማካሄድ ላይ ይገኛል።
በመድረኩ የ2016 በጀት አመት አፈፃፀም ግምገማና የ2017 እቅድ ምክክር የሚደረግ ይሆናል።
በ-መቅደስ ደምስ
YouTube – https://www.youtube.com/@NBCEthiopiaSC
TikTok – https://www.tiktok.com/@nbcethiopia
Facebook -https://www.facebook.com/ethiopiannbc
Telegram-https://t.me/nbcethiopiatv












