“ፋኖ ለአማራ ሕዝብ አደገኛ ነቀርሳና ፀረ-ሰላም ኃይል ነው” ሲሉ የቀድሞ የፋኖ አመራር ማርእሸት ፀሐዩ በኤንቢሲ ኢትዮጵያ “ጊዜ ግስ” ፕሮግራም ላይ በነበራቸው ቆይታ ገለጹ።

እንደ አቶ ማርእሸት ገለፃ፣ ፋኖ ግልጽ የሆነ የትግል ዓላማ ሳይኖረው የአማራን አርሶ አደር ለከንቱ መስዋዕትነት እየዳረገ ያለ ፅንፈኛ ኃይል እንደሆነ ጠቁመው፣ ሕዝቡን ላልተፈለገ ግጭት እየገፋፋ መሆኑን ነው የተናገሩት።
ባለፉት ዓመታት በወለጋና በመተከል የተፈጸሙ ጥቃቶችን ከብሔር ማንነት ጋር በማያያዝ የአማራ ሕዝብን ለራሱ የፖለቲካ ዓላማ ሲጠቀም እንደነበር አስታወሰው፣ አሁን ደግሞ በአርሲ የተፈጸመውን ጥቃት የሃይማኖት ሽፋን ለመስጠት እየሞከረ እንደሆነ ገልፀዋል።
የፋኖን አደረጃጀት በፖለቲካዊና በወታደራዊ አማራጮች ላይ በቂ ግምገማ የማያደርግ፣ ያለውን ሀብትና አቅም በአግባቡ ያልተገነዘበ ስብስብ እንደሆነ ጠቁመው፣ በተለያዩ አካባቢዎች ያሉ “የጎበዝ አለቆች” በግል የሥልጣን ፍላጎት የተከፋፈሉበት ቡድን መሆኑን አንስተዋል።
ህገወጥ ቡድኑ ባለሀብቶችን በማስፈራራት በሚሊዮኖች የሚቆጠር ብር በግዳጅ እንደሚሰበስብ እንዲሁም አመራሮቹ ሚሊዮን ዶላሮች በውጭ ሀገራት ባንኮች እንዳላቸው አጋልጠዋል።
በተጨማሪም የአመራሮቹ የሥልጣን ፍላጎት ካልተሳካ ከዓለም አቀፍ የሽብር ቡድኖች ጋር ሊተባበሩ እንደሚችሉና ይህም ለሀገሪቱ የደኅንነት ስጋት ሊፈጥር እንደሚችል ገልጸዋል።
አቶ ማርእሸት በሰጡት ማብራሪያ፣ በፋይናንስ አቅም የሚደገፍና በአካውንቱ ሚሊዮን ዶላር በመያዝ ለሚፈልገው አካል ገንዘብ የሚሰጥ “የእስክንድር ጽንፈኛ ቡድን እንዲሁም ዘመነ መሪ መሆን አለበት የሚል አቋም ያለው የዘመነ ጽንፈኛ ቡድን የሚባሉ ሁለት አንጃዎች ተፈጥረዋል” ሲሉ ይገልፃሉ። እነዚህ ፅንፈኛ ቡድኖች ያቃቃራቸው የርዕዮተ-ዓለም ልዩነት ሳይሆን ሥልጣንን የመቆጣጠር ፉክክርና ፍላጎት መሆኑን አስረድተዋል።

በሚዲያ የሚንቀሳቀሱ የቡድኑን አፈቀላጤዎች በተመለከተ፣ በገንዘብና በሌሎች አካላት ፍላጎት የሚመሩ እንዲሁም በእውቀትና በሙያዊ ትንተና ፈንታ ወሬን፣ አሉባልታንና ስድብን በማስተጋባት ላይ ያተኮሩ እንደሆኑ ገልፀዋል።
የዘራፊዎች ዘመን ማብቃቱንና አሁን የአዲስ መንግሥት፣ አመራር እንዲሁም የአዲስ ትውልድ ዘመን መሆኑን ገልፀው፤ ኢትዮጵያም በአዲስ ርዕዮተ-ዓለም እና የስልጣኔ መንገድ የምትራመድበት ወርቃማ ምዕራፍ ላይ እንደምትገኝ አቶ ማርእሸት ተናግረዋል።
የቀድሞ የፋኖ አመራር ማርእሸት ፀሐዩ ከNBC ኢትዮጵያ “ጊዜ ግስ” ፕሮግራም ጋር ያደረጉት ክፍል 2 ቆይታ በቅርቡ ለተመልካቾች ይቀርባል።









