የኢትዮጵያ የባህር በር ጥያቄ ከንግድና ከኢኮኖሚ ተጠቃሚነት ባለፈ፣ ከሀገሪቱ የወደፊት ዕድገትና ከቀጠናው ጂኦፖለቲካዊ ሁኔታ ጋር የተያያዘ ጉዳይ እንደሆነ ይገለጻል። የሀገሪቱ የወደብ አገልግሎት ወጪ፣ የሕዝብ ቁጥር ዕድገትና በቀጠናው ያለው የፖለቲካ ፍጥጫ የባህር በር ጥያቄውን አስፈላጊነት የሚያጎሉ ጉዳዮች መሆናቸው ይነገራል።

በአዲስ አበባ ዩኒቨርሲቲ የፖለቲካ ሳይንስና ዓለም አቀፉ ግንኙነት መምህር እንዲሁም በNBC ኢትዮጵያ የ“ዓለም አቀፍ” ፕሮግራም ተባባሪ አዘጋጅ የሆኑት ትዕዛዙ መሐመድ፣ ኢትዮጵያ ካለችበት ነባራዊ የኢኮኖሚና የጂኦፖለቲካ ሁኔታ አንጻር የባህር በር እንዲኖራት የምታቀርበው ጥያቄ ተገቢ መሆኑን አብራርተዋል።
ኢትዮጵያ ለወደብ አገልግሎት ብቻ በየዓመቱ ከ2 ቢሊዮን ዶላር በላይ የውጭ ምንዛሬ እያወጣች መሆኑን ያነሱት መምህር ትዕዛዙ፣ ይህ ገንዘብ ለሌሎች የልማት ዘርፎች ቢውል በርካታ የሀገሪቱን የመሰረተ ልማት ችግሮች መፍታት እንደሚችል አንስተዋል። አያያዘውም የሀገሪቱ ኢኮኖሚ እያደገ ሲሄድ የወደብ አገልግሎት ወጪውም በእጥፍ ሊጨምር እንደሚችል በማስረዳት፣ ይህም ሀገሪቱ ላይ ከፍተኛ የኢኮኖሚ ጫና እንደሚያመጣ አመልክተዋል።

በተጨማሪም የኢትዮጵያ ሕዝብ ቁጥርና ኢኮኖሚ በፍጥነት እያደገ መምጣቱን በመጠቆም፣ ይህንን እያደገ የመጣውን የሕዝብና ኢኮኖሚያዊ ለዉጥ ከቀይ ባህር ጋር ማሰተሳሰር እንደሚገባ አስገንዝበዋል።በቀጠናው ያለውን የፖለቲካ ተፅዕኖና የሀገራት ግንኙነት በተመለከተም፣ ግብጽ በኢትዮጵያ ጎረቤት ሀገራት ውስጥ ያላትን አሉታዊ ጫና በማሳደግ የኢትዮጵያን የውሃ ጥቅሞችና ሉዓላዊነት ለማደናቀፍ እየሰራች መሆኑን ገልጸዋል።
በሌላ በኩል የኤርትራ አመራሮች ከኢትዮጵያ ጋር የኢኮኖሚ ትብብር ከመፍጠር መራቃቸው ለሁለቱም ሀገራት የማይጠቅም መሆኑን አንስተው፣ ሱዳንም የግብጽን ጥቅም ብቻ ከማስቀደም ይልቅ ከኢትዮጵያ ጋር ያላትን የጋራ ጥቅም ማጠናከር እንዳለባት ነው ያስታወሱት።
እንደአብነት የቀድሞውን የሱዳን መሪ ኦማር አልበሽር አስተዳደርን ያነሱት ተባባሪ አዘጋጁ፣ በወቅቱ ከኢትዮጵያ ጋር በመተባበር የናይል ወንዝ ፍሰትንና ከጎርፍ ጋር የተያያዙ ጉዳዮችን በጋራ ለመፍታት ጥረት ሲያደርጉ እንደነበር ጠቅሰው፣ ሆኖም በግብጽ ግፊትና ተጽዕኖ ምክንያት የትብብር ሂደቱ መስተጓጎሉን ይጠቅሳሉ።
በአባይ ወንዝ ዙሪያ የግብጽን አቋም መምህሩ ሲገልፁ፣ ግብጽ ከዓመታት በፊት ከነበረው “አባይ የእኔ ስጦታ ነው” ከሚል ያለፈበት አስተሳሰብ ወጥታ ዘመኑን የዋጀ የቴክኖሎጂ አጠቃቀምን በመከተል የውሃ ፍላጎቷን በአማራጭ ማሟላት እንደምትችል አንስተዋል። እስካሁን ድረስም በቅኝ ግዛት ጊዜ የተደረጉ ኢፍትሃዊ ውሎችን ብቻ በመያዝ የላይኛው ተፋሰስ ሀገራትን በአባይ ወንዝ ላይ ያለእኔ ፍቃድ ምንም ነገር ማድረግ አትችሉም ማለቷ አግባብ እንዳልሆነ ተናግረዋል። በተጨማሪም ኢትዮጵያ የህዳሴውን ግድብ ስትገነባ የውሃ ፍሰቱን ሙሉ በሙሉ እንዳላቋረጠች እና የጋራ ተጠቃሚነትን እንደምትፈልግም ነው ያነሱት።
የአጎራባች ሀገራትን ትብብር አስፈላጊነት በተመለከተ፣ የኢትዮጵያና የኤርትራ ኢኮኖሚያዊ ግንኙነት የተሳሰረ እንደመሆኑ መጠን በትብብር መስራት በንግድና በኢኮኖሚው ዘርፍ ትልቅ ዕድገት ማምጣት እንደሚቻል ተናግረዋል።
ከዚህ አኳያ የኤርትራ አመራሮች ከኢትዮጵያ ጋር አብሮ ለመስራት ፈቃደኛ አለመሆናቸው ለሀገሪቱና ለሕዝቧ ጉዳት እያስከተለ መሆኑን አንስተዋል።
በታሪክ ውስጥ ዓለም አቀፍ ድንበሮች በጦርነትም ሆነ በዲፕሎማሲ ስምምነት ሊለወጡ እንደሚችሉ ያስረዱት መምህሩ፣ የፈረንሳይን አልሳስና ሎሬን ግዛቶች እንዲሁም የሆንግኮንግን ታሪክ እንደምሳሌ ጠቅሰዋል። ፈረንሳይ በጦርነት ያጣቻቸውን አልሳስና ሎሬን ከአንደኛው ዓለም ጦርነት በኋላ ማስመለሷን፣ ሆንግኮንግም ከረጅም የብሪታንያ ቆይታ በኋላ ለቻይና መመለሷን በማስታወስ፣ የግዛት ጉዳዮች በዲፕሎማሲያዊ መንገድ መፍትሔ ሊያገኙ እንደሚችሉ አብራርተዋል።
ኢትዮጵያ ያላግባብ ያጣችውን የባህር በር በፍትሐዊና በሰላማዊ መንገድ ለማግኘት የምታደርገውን ጥረት በዲፕሎማሲያዊ መንገድ መቀጠል እንዳለባት ገልጸው፣ ይህም የሀገሪቱን ሉዓላዊ ጥቅምና የኢኮኖሚ ፍላጎት ከቀጠናዊ ትብብር እንዲሁም ከጋራ ተጠቃሚነት ጋር ባገናዘበ መልኩ መከናወን እንዳለበት ተናግረዋል።
በ-በረከት አስረስ












