
በ«መደመር» ስትራቴጂ የሚመራው የኢትዮጵያ የረጅም ጊዜ የልማት ራዕይ ለሰው ሀብት ልማትና ለሴቶች እኩልነት ማዕከላዊ ቦታ መስጠቱን የሕዝብ ተወካዮች ምክር ቤት አፈ-ጉባኤ አህመድ ሽዴ ገልፀዋል።
እንደ አፈ-ጉባኤው ገለጻ፣ ኢትዮጵያ እስከ እ.ኤ.አ 2050 በሚዘልቀው የረጅም ጊዜ «መደመር» ስትራቴጂ አማካይነት ሙሉ ሀገራዊ አቅሟን፣ ህዝቧን፣ ተቋሞቿንና ሀብቷን በማቀናጀት ለጋራ ሀገራዊ ግብ በቁርጠኝነት እየሰራች እንደምትገኝ ጠቁመዋል።
በተጨማሪም ኢትዮጵያ ሀገር በቀል በሆኑ እሳቤዎች ላይ የተመሰረቱ የልማት መፍትሄዎችን እንዲሁም በሃሳብ፣ በስትራቴጂና በተጠያቂነት የሚመራ ዘመናዊ አስተዳደርን በውጤታማነት በመተግበር ላይ እንደምትገኝ አስረድተዋል።

በአዲስ አበባ በተዘጋጀው የአፍሪካ-እስያ ፓርላማ አባላት ውይይት መድረክ የፓርላማ አባላት የህዝብ ቁጥርና ልማት፣ የስነ-ተዋልዶ ጤናና መብቶች እንዲሁም የጾታ እኩልነት ፖሊሲ ላይ ያተኮረ ነው።
የመደመር መንግስት ይህንን ግዙፍ የረጅም ጊዜ ራዕይ ወደ ተጨባጭ ውጤት ለመለወጥ አዳዲስ መፍትሄዎችን በመፍጠር፣ የአገልግሎትና የልማት አቅርቦትን በማፋጠን፣ ስኬታማ ስራዎችን በማስፋፋትና በመድገም እንዲሁም በሁሉም የልማት መስኮች ጥራትን በማረጋገጥ ላይ ትኩረት አድርጎ እየሰራ እንደሚገኝም አፈ ጉባኤው አብራርተዋል።
እነዚህ መርሆች በትምህርት፣ በጤና፣ በመሰረተ ልማት ግንባታዎችና በሌሎችም የማህበራዊና ኢኮኖሚያዊ ዘርፎች በተመሳሳይ ሁኔታ ስራ ላይ እየዋሉ መሆናቸውን አመላክተዋል።

ከዚህ ጎን ለጎን ኢትዮጵያ «ራስን መቻል» በሚል መርህ ላይ ሀገራዊ አቅሟን እየገነባች እንደሆነ የገለፁት አፈ-ጉባኤው፤ ይህም ውጫዊ ጫናዎችን መቋቋም የሚችሉ ጠንካራ ፖለቲካዊ፣ ኢኮኖሚያዊና ተቋማዊ አቅሞችን በመገንባት፣ የሚገጥሙ ፈተናዎችን ለሀገር እድገት ወደሚጠቅሙ ስትራቴጂካዊ እድሎች በመቀየር እየተተገበረ እንደሚገኝ ገልጸዋል።
የማንኛውም ሀገር ትክክለኛው የዕድገትና የጥንካሬ መሠረት በግንባታዎችና በተቋማት ብቻ የማይወሰን መሆኑን ያመለከቱት አፈ-ጉባኤው፣ ዋናው አቅም የህዝቡ ጤና፣ ትምህርት፣ ክህሎትና ሰብዓዊ ክብር መሆኑን አበክረው ገልጸዋል።
በዚህም ምክንያት የህዝብ ቁጥርና ልማት፣ የስነ-ተዋልዶ ጤናና መብቶች እንዲሁም የጾታ እኩልነት ጉዳዮች ሁለተኛ ደረጃ ጉዳዮች ሳይሆኑ፣ የሀገራዊ አቅምና የረጅም ጊዜ ስትራቴጂው ማዕከል መሆናቸውን መናገራቸውን ከምክር ቤቱ የተገኘው መረጃ ያመለክታል፡፡












