
ጠቅላይ ሚኒስትር ዐቢይ አሕመድ (ዶ/ር) ከቃና ቴሌቪዥን ጋር ቆይታ ያደረጉ ሲሆን በቆይታቸውም ወደ ኤሌክትሪክ መኪናዎች ስለሚደረገው ሽግግር፣ ስለኮሪደር እና ወንዝ ዳርቻ ልማቶች ድርብርብ ዓላማዎች እንዲሁም ሌሎች ጉዳዮች ማብራርያ ሰጥተዋል።
ኢትዮጵያ የኤሌክትሪክ መኪናዎችን በስፋት ጥቅም ላይ ለማዋል የጀመረችው እንቅስቃሴ የረጅም ጊዜ የኃይል ዋስትና ለማረጋገጥ ያለመ ስትራቴጂካዊ ውሳኔ መሆኑን የገለጹት ጠቅላይ ሚኒስትሩ ጠቅላይ ሚኒስትሩ የነዳጅ መኪናዎችን አጠቃቀም ለመቀነስ የተያዘው አቅጣጫ መጀመሪያ ላይ ቅሬታዎች ቢነሱበትም፣ ዓለም አቀፋዊ የነዳጅ ዋጋ መዋዥቅና የጂኦፖለቲካዊ ግጭቶች በሀገር ኢኮኖሚ ላይ የሚያሳድሩትን ተፅዕኖ ለመቋቋም ብቸኛው አማራጭ ነው ብለዋል።
ኢትዮጵያ ነዳጅ አምራች ሀገር አለመሆኗን የጠቆሙት ጠቅላይ ሚኒስትሩ፤ የነዳጅ ዋጋ በጨመረ ቁጥር የሚከሰተውን የዋጋ ንረት ለመቆጣጠር በሀገር ውስጥ የሚመረተውን የታዳሽ ኃይል መጠቀም የኃይል ሉዓላዊነትን እንደሚያረጋግጥ አብራርተዋል።
“በዋጋ ደረጃ የነዳጅና የኤሌክትሪክ ወጪ እኩል ቢሆን እንኳ፣ የኤሌክትሪክ መኪና ተመራጭ ነው፤ ምክንያቱም ኃይሉን እዚሁ ሀገር ውስጥ ስለምናመርት እንደ ነዳጅ ‘ተዘጋብኝ’ የሚል ስጋት አይኖርም” በማለት የችግሩን አሳሳቢነትና የመፍትሔውን አስፈላጊነት አስገንዝበዋል።
ወደ ኤሌክትሪክ መኪና የሚደረገው ሽግግር ከወጪ ንግድ የሚገኘውን ከፍተኛ የውጭ ምንዛሬ ለነዳጅ ግዢ ከመስጠት የሚታደግ ከመሆኑም ባለፈ፣ ለአካባቢ ጥበቃና ለዜጎች የኑሮ ጫና መቀነስ ትልቅ ፋይዳ አለው ብለዋል።
መኪናዎቹ ጪስና ድምፅ የሌላቸው መሆኑ እንዲሁም የማንቀሳቀሻ ወጪያቸው እጅግ አነስተኛ መሆኑ ለሀገርም ሆነ ለተጠቃሚው ትልቅ ዕድል መሆኑን ጠቅላይ ሚኒስትሩ አብራርተዋል።
ጠቅላይ ሚኒስትሩ በቃለ መጠይቃቸው የኮሪደር ልማትንም ያነሱ ሲሆን የከተማን ገጽታ ከመቀየር ባለፈ የነዋሪዎችን ማኅበራዊና ኢኮኖሚያዊ ተጠቃሚነት የሚያረጋግጥ ድርብርብ ዓላማ ያለው ግዙፍ ስትራቴጂካዊ ፕሮጀክት መሆኑን ገልጸዋል።
ማንኛውም የልማት ሥራ ግልጽ ግብ ሊኖረው እንደሚገባ በመጥቀስ፣ የኮሪደር ልማት ኢኮኖሚያዊ፣ ማኅበራዊና አካባቢያዊ ግቦችን በአንድነት አቀናጅቶ የያዘ መሆኑን አብራርተዋል።
ፕሮጀክቱ በግንባታ ወቅትና ከግንባታ በኋላ ተከታታይነት ያለው የሥራ ዕድል ከመፍጠሩም በላይ፣ ለወጣት መሐንዲሶች ትልቅ የተግባር ልምድ መጋሪያ ሆኖ ማገልገሉን ተናግረዋል።
በዩኒቨርሲቲ ከሚገኘው የንድፈ-ሐሳብ እውቀት ባለፈ ወጣቶች ከፍተኛ የተግባራዊ እውቀት እንዲቀስሙ ማስቻሉን የጠቀሱት ጠቅላይ ሚኒስትሩ፣ በአዲስ አበባ ልምድ ያገኙ ወጣቶች አሁን ላይ በክልል ከተሞች አስገራሚ የዲዛይንና የግንባታ ሥራዎችን እያከናወኑ እንደሚገኙም ጠቁመዋል።
የኮሪደር ልማቱ አንዱ አካል የሆነው የቤት ግንባታ፣ በሀገሪቱ የነበረውን የቤት እጥረት ለመቅረፍ በከፍተኛ ፍጥነት በሺዎች የሚቆጠሩ ቤቶችን ለመገንባት ማስቻሉን አንስተዋል።
ልማቱ ይዞታዎችን በመለየትና ለተገቢው ዓላማ በማዋል፣ ለኑሮ የማይመቹና በላስቲክ የተሠሩ ቤቶች በዘመናዊና ደረጃቸውን በጠበቁ ሕንፃዎች እንዲተኩ እያደረገ መሆኑም አብራርተዋል።
በተጨማሪም የመንገድ፣ የመብራትና የእግረኛ መንገዶች መሻሻል በኮሪደሩ አቅራቢያ ያሉ የቤትና የሕንፃ ዋጋዎች እጅግ እንዲጨምሩ በማድረጉ፣ ባለሀብቶች በልበ ሙሉነት በዘርፉ ላይ ኢንቨስት እንዲያደርጉ ምቹ ሁኔታን ፈጥሯል ብለዋል።
ልማቱ አማራጭ መንገዶችን በመፍጠርና የነበሩትን በማስፋት፣ ቀደም ሲል የነበረውን የትራፊክ መጨናነቅ በከፍተኛ ደረጃ መቅረፉን ያነሱት ጠቅላይ ሚኒስትሩ፣ በአዲስ አበባ የመኪናና የእግረኛ መንገዶች ተለይተው በመሠራታቸው፣ ነዋሪዎች ሳይጉላሉ በፈጠነ ጊዜ ወደሚፈልጉት ቦታ መድረስ እንዲችሉ ማድረጉንም ጠቅሰዋል።
ኢትዮጵያ በቅኝ ግዛት ያልተገዛችና የታላቅ ድል ባለቤት ብትሆንም፣ የውጭ ሀገር መሪዎች ወደ ሀገራችን ሲመጡ በክብር የአበባ ጉንጉን የሚያስቀምጡበት በቂ ስፍራ እንዳልነበረም ጠቅላይ ሚኒስትሩ የገለጹ ሲሆን፣ እንደ ዓድዋ ድል መታሰቢያ እና የታደሱት ቤተ-መንግሥታት ያሉ ግዙፍ ፕሮጀክቶች ይህንን ታሪካዊ ክፍተት በመሙላት የሀገሪቱን ገጽታ መቀየራቸውን ጠቁመዋል።
እነዚህ የልማት ሥራዎች ቱሪዝምን ከመሳብ ባለፈ፣ ትውልዱ የሀገሩን ማንነት አውቆ በኢትዮጵያዊነቱ እንዲኮራና የአርበኝነት ስሜቱ እንዲገነባ ከፍተኛ ድርሻ እንዳላቸው ጠቅላይ ሚኒስትሩ አስገንዝበዋል።
አዲስ አበባ እንደ ኒውዮርክ፣ ፓሪስ እና ሪዮ ዲጄኔሮ ከተሞች የራሷ የሆኑ ዓለም አቀፍ መለያዎች ሊኖሯት እንደሚገባ በመጥቀስ፣ በእንጦጦና በየካ አካባቢ የተሰሩ ስራዎች ከተማዋን እንደ “ሆሊውድ” ያሉ ዓለም አቀፍ የቱሪስት መስህቦች ባለቤት እንደሚያደርጓት አመልክተዋል።
ይህ ከተማን ዘመናዊ የማድረግ ሥራ የኢትዮጵያ የክብር ታሪክ ለዓለም በሚመጥን መልኩ ለማሳየት ያለመ መሆኑንም ገልፀዋል።
የኢትዮጵያን የብልጽግና ጉዞ ለማሳካት የሚከናወኑ የልማት ሥራዎች በትውልድ መስዋዕትነት የሚገነቡና የዜጎችን የጋራ ተጠቃሚነት የሚያረጋግጡ መሆናቸውን ጠቅላይ ሚኒስትር ዐቢይ አሕመድ (ዶ/ር) በቆይታቸው አንስተዋል።
እንደ ከተማ መልሶ ማልማትና ክላስተር እርሻ ያሉ ግዙፍ ፕሮጀክቶች ሲከናወኑ ለጊዜው የሚታዩ ተግዳሮቶች ለረጅም ጊዜ ስኬት ሲባል የሚታለፉ መሆናቸውን የጠቀሱት ጠቅላይ ሚኒስትሩ፤ የልማቱ ድምር ውጤት በሀገርም ሆነ በቤተሰብ ደረጃ ዕድገት እንጂ ውድቀት እንደማያመጣ አስረድተዋል።
የሀገር ግንባታ በዋዛ ፈዛዛ እንደማይሳካና የበለጸጉ ሀገራት ዛሬ ለደረሱበት ደረጃ የበቁት በዜጎቻቸው “ደም እና አጥንት” መሆኑን ጠቅላይ ሚኒስትሩ አስታውሰው የኢትዮጵያን የብልጽግና ጉዞ ለማሳካት የሚከናወኑ የልማት ሥራዎች ዋናው ዓላማ ለሕዝብና ለሀገር ብልጽግና መሥራት መሆኑን አስገንዝበዋል።
አሁን የሚታዩ ችግሮች ጊዜያዊ ቢሆኑም፣ በረጅም ጊዜ ሂደት ኢትዮጵያ ስታድግ የማይጠቀም ዜጋ እንደማይኖርና እያንዳንዷ ሰከንድ የኢትዮጵያን ብልጽግና በሚያረጋግጡ ጉዳዮች ላይ ብቻ እንደምትውል አረጋግጠዋል።
በአዲስ አበባ ከተማ እየተከናወነ ያለው የወንዝ ዳርቻ ልማት ፕሮጀክት ለብዙ ሀገራት ምሳሌ የሚሆን፣ ለልጆቻችን የምናወርሰው ኩራት እና የነገዋ ኢትዮጵያ አዲስ መልክ ነው ሲሉም ጠቅላይ ሚኒስትር ዐቢይ አሕመድ በዘርፉ የተከናወነውን ልማት አብራርተዋል።
ጠቅላይ ሚኒስትሩ እንዳመለከቱት፣ በአጠቃላይ 50 ኪሎ ሜትር የሚሸፍነው እና ስምንት ወንዞችን የሚያካትተው ይህ ግዙፍ ፕሮጀክት ለከተማዋ አዲስ ገጽታ እያላበሰ የሚገኝ ሲሆን፣ ቀደም ሲል ለጤና አስጊ እና መርዛማ የነበሩ የወንዝ ዳርቻዎች በአሁኑ ወቅት ወደ ለምለም አረንጓዴ ስፍራዎች እና ማራኪ የመዝናኛ ቦታዎች ተቀይረዋል።
ይህ የልማት ሥራ የከተማዋን ነዋሪዎች የኑሮ ዘይቤ ከመቀየሩ ባለፈ፣ ጥቁር እና መርዛማ የነበሩ ወንዞችን በዘመናዊ መንገድ በማከም ንጹሕ ውኃ እንዲፈስባቸው አድርጓል።
በዚህም ተፈጥሮ ወደ ቀድሞ ይዘቷ እንድትመለስ የተደረገ ሲሆን፣ ከወንዞቹ የሚወጣው ቆሻሻም ተመልሶ ለማዳበሪያ እና ለሌሎች ጥቅሞች እንዲውል እየተደረገ ይገኛል።
በተጨማሪም በወንዝ ዳርቻዎቹ ሰፊ የመራመጃ መንገዶች እና የስፖርት ሜዳዎች በመገንባታቸው፣ ጤናማ እና አብሮነት የሰፈነበት ማኅበረሰብ ለመፍጠር ትልቅ ዕድል ተፈጥሯል።
ጠቅላይ ሚኒስትር ዐቢይ አሕመድ (ዶ/ር) አክለውም፣ በአዲስ አበባ የተመዘገበው ይህ ስኬታማ የልማት ተሞክሮ በአሁኑ ወቅት በሐዋሳ፣ በቢሾፍቱ፣ በባሕር ዳር እና በሌሎች የኢትዮጵያ ከተሞችም ተግባራዊ መሆን መጀመሩን ገልጸዋል።
ይህ ተግባር ከተሞች ለነዋሪዎቻቸው ምቹ እንዲሆኑ እና የተፈጥሮ ሀብታቸውን ለልማት እንዲያውሉ የሚያስችል ትልቅ ሀገራዊ ንቅናቄ መሆኑንም ገልጸዋል።












