NBC Ethiopia
February 18, 2026
“ዛሬ በቄለም ወለጋ ዞን ሃዋ ገላን ወረዳ በሌማት ትሩፋት መርሃ-ግብር የለማ የሙዝ እርሻ ከባቢን ጎብኝቻለሁ። አርሶአደሮች በፍጹም ጽናት፣ ቅንጅት እና ትብብር አካባቢያቸውን በቀየረ ስራ በመመልከቴ ደስ ብሎኛል። የተመለከትነው የእርሻ ስራ፤ የአካባቢ መሬትን እና የውኃ ኃብትን በአግባቡ መጠቀም ከተቻለ ትርጉም ያለው ለውጥ ማምጣት እንደሚቻል ማሳያ ነው።

ባህላዊ የመስኖ ዘዴዎችን በመጠቀም እና በቅርብ ያለ ኃብትን በሚገባ ጥቅም ላይ በማዋል ማኅበረሰቡ ውጤታማ እና ተስፋ ሰጪ የግብርና ማዕከል መፍጠር ችሏል። በተለይም የመንገድ መሠረተ ልማት የአርሶአደሮችን ምርት በቀላሉ ወደ ገበያ ለማድረስ የፈጠረውን እድል መመልከት እጅግ የሚያበረታታ ነው። ይኽ እድገት የልማት ጥረቶች ከአካባቢው ማኅበረሰብ ፍላጎት እና አቅም ጋር በቅርበት ሲናበቡ ሊገኝ የሚችለውን ውጤት በግልጽ የሚያሳይ ነው።” ጠቅላይ ሚኒስትር ዐቢይ አሕመድ (ዶ/ር)

“ለሰዲ ጫንቃ እና ሃዋ ገላን ወረዳዎች ትርጉም ያለው ለውጥ እያመጣ ያለውን የቄጦ የመስኖ መሠረተ ልማት ፕሮጀክትን ለመመልከት እድል አግኝቻለሁ። ፕሮጀክቱ ለግብርና ሥራ የማይቋረጥ የውሃ አቅርቦትን በሚያረጋግጥ መልኩ የአካባቢውን የተፈጥሮ መልክዓ-ምድር በአግባቡ ለመጠቀም ታስቦበት የተተገበረ ነው። የመስኖ ሥራውን በቀጥታ ጥቅም ላይ በማዋል የታረሰ እና የለማ መሬት ለኅብረተሰቡ ጉልህ ፋይዳ ማስገኘት መጀመሩም አበረታች ነው። አብሮ የተሠራው የመንገድ መሠረተ ልማትም የገበያ ተደራሽነትን አስፍቷል፣ የነዋሪዎችን የቀን ተቀን ኑሮ እንቅስቃሴንም አቅልሏል።

አካባቢው ሰፊ የግብርና እምቅ አቅም ያለው እንደመሆኑ እንደ ስንዴ፣ ሩዝ፣ ሙዝ፣ ፓፓያ እና ብርቱካን ያሉትን ምርቶች በመደገፍ ረገድ የመስኖ እና የመሠረተ ልማት ሥራ ዘላቂ የገጠር ግብርና ልማትን ማሳደግ እንደሚችሉ አብነት ነው።” ጠቅላይ ሚኒስትር ዐቢይ አሕመድ (ዶ/ር)

“የቱሉ ካፒ የወርቅ ልማት ፕሮጀክት የተፈጥሮ ኃብታችንን እንዴት ለሀገር እና ሕዝብ ጥቅም በኃላፊነት ልንጠቀምበት እንደምንችል የሚያሳይ አይነተኛ ምሳሌ ነው። በምዕራብ ወለጋ ገንጂ ዞን የሚገኘው ፕሮጀክቱ በመንግሥት እና የግል ኢንቨስተሮች ትብብር እየተሠራ የሚገኝ ነው። ከኢኮኖሚያዊ ጠቀሜታው ባሻገር ፕሮጀክቱ ለትምህርት፣ የመንገድ ልማት፣ የጤና ተቋማት እና ዘመናዊ የመኖሪያ ቤት ግንባታን የማነቃቃት አቅም አለው። በጉብኝታችን ወቅት እንደተመለከትኩት የፕሮጀክቱ ፋይዳ በአንድ የተወሰነ ብቻ ሳይሆን የአካባቢውን ማኅበረሰብ የበለጠ ለልማት በማነሳሳት ከፍ ያለ ሚናውን እንደሚያስቀጥል እምነቴ የፀና ነው።” ጠቅላይ ሚኒስትር ዐቢይ አሕመድ (ዶ/ር)

“የአርጆ ከሰል ድንጋይ ፋብሪካ፤ ከውጭ ሲገባ የነበረውን የተፈጨ ድንጋይ ፍላጎት በሀገር ውስጥ በማሟላት በኢትዮጵያ የዘርፉ የኢንደስትሪ ልማት ዐቢይ ሚና ይጫወታል። ፋብሪካው ለሲሚንቶ፣ ለብረት እና ኮንስትራክሽን ኢንደስትሪዎች አስፈላጊ ጥሬ ግብዓቶችን ያቀርባል። በተጨማሪም ፕሮጀክቱ ኢትዮጵያ የአካባቢ ጥበቃን በማረጋገጥ የኢንደስትሪ ልማትን እንደምታሳድግ ማሳያ ነው።” ጠቅላይ ሚኒስትር ዐቢይ አህመድ (ዶ/ር)

“የአርጆ የደንጋይ ክሰል ፋብሪካ መመረቅ የኢትዮጵያን ኢንዱስትሪ ወደፊት የሚያስፈነጥር ነው። ከውጭ የሚገባውን ይተካል፣ የሥራ ዕድል ይፈጥራል፣ የፋብሪካዎችን የማጓጓዣ ወጪ ይቀንሳል።በብዙ ነገሮች ራሳችንን እየቻልን ነው። ሉዓላዊነታችንም በሁለንተናዊ መልክ ምሉዕ እየሆነ ነው። ኢትዮጵያ ትገሠግሣለች።” ምክትል ጠቅላይ ሚኒስትር ተመስገን ጥሩነህ














