
የሕዝብ ተወካዮች ምክር ቤት ኢትዮጵያ ከቻይና፣ ከብራዚል እና ከደቡብ አፍሪካ ጋር ያደረገችውን በወንጀል የሚፈለጉ ሰዎችን አሳልፎ የመስጠት እና ፍርደኞችን የማስተላለፍ ስምምነት አጸደቀ።
6ኛው የሕዝብ ተወካዮች ምክር ቤት በ5ኛ ዓመት የሥራ ዘመኑ 9ኛ መደበኛ ስብሰባውን አካሂዷል። ምክር ቤቱ በመደበኛ ስብሰባው የኢትዮጵያ መንግሥት ከቻይና፣ ከብራዚል እና ደቡብ አፍሪካ ጋር ያደረጋቸውን ፍርደኞችን የማስተላለፍ እና በወንጀል የሚፈለጉ ሰዎችን አሳልፎ የመስጠት የስምምነት አዋጆችን አጽድቋል።
በኢትዮጵያ እና በቻይና መንግሥት መካከል የተደረገውን የወንጀል ጉዳዮች የጋራ የሕግ ትብብር ስምምነት ረቂቅ አዋጅም ምክር ቤቱ በአብላጫ ድምፅ አጽድቆታል።
በተጨማሪም ከቻይና፣ ከብራዚል እና ከደቡብ አፍሪካ ጋር የተደረገውን ፍርደኞችን የማስተላለፍ እና በወንጀል የሚፈለጉ ሰዎችን አሳልፎ የመስጠት ረቂቅ አዋጅ መርምሮ አጽድቋል።
ኢትዮጵያ ከተለያዩ አገራት ጋር ያላት የንግድ፣ ኢንቨስትመንት እና የትብብር አቅም እያደገ በመምጣቱ መሰል የሕግ ስምምነቶች መደረጋቸው አስፈላጊ መሆኑ ተመላክቷል።
በስምምነቱ መሠረት ኢትዮጵያ ከሦስቱ የብሪክስ (BRICS) አባል አገራት ጋር በወንጀል ጉዳዮች የሕግ ትብብር የምታደርግ ሲሆን፤ ፍርደኞችን እና በወንጀል የሚፈለጉ ሰዎችን አሳልፋ የምትሰጥ እንዲሁም የምትቀበል ይሆናል።












