የእናቶችና የህፃናት ጤና እየተሻሻለ መጥቷል የእናቶች ሞት ከ2016 ከነበረው ቁጥር ጋር ሲነፃፀር ከፍተኛ ለውጥ የተመዘገበበት እንደነበር የጤና ሚኒስትር ዶ/ር መቅደስ ዳባ ተናግረዋል።

ከ3 ሚሊየን በላይ ነፍሰ ጡር እናቶች በጤና ተቋማት መውለድ ችለዋል ያሉት ሚኒስትሯ ከ3 ነጥብ 8 ሚሊየን በላይ ህፃናት ሶስት ዙር ክትባት እንዲያገኙ ማድረግ መቻሉን ገልፀዋል። 1 ነጥብ 4 ሚሊየን ህፃናት ከዚህ በፊት ምንም አይነት ክትባት አግኝተው የማያውቁ ህፃናት እንዲያገኙ ማድረግ ተችሏል ብለዋል።
የኩፍኝ ክትባት ከ1 ነጥብ 5 ሚሊየን በላይ ለሚሆኑ ህፃናት መስጠት የተቻለ ሲሆን በዚህም የኢፖክሲ ወረርሺኝ ስርጭትን ለመከላከል ተችሏል ነው ያሉት።
ሚኒስትሯ አክለውም በ2017 13 ነጥብ 5 ሚሊየን ዜጎች የጤና መድን አገልግሎትን ተጠቃሚ እንዲሆኑ መደረጉን ገልፀው በአጠቃላይ የጤና መድን አገልግሎት ተጠቃሚዎች ቁጥር ከ60 ሚሊየን በላይ መድረሱን አስረድተዋል።
ሀገራት የሚያደርጓቸው ድጋፎች የቀነሱበት አመት እንደነበር ያስታወሱት ሚኒስትሯ ሊፈጠሩ የሚችል የፋይናንስ እጥረት እንዳይኖር የተለያዩ አማራጭ መፍትሄዎች መቀመጣቸውን አብራርተዋል።
በ2018 ፍትሀዊ የመጀመሪያ ደረጃ እንክብካቤ ተደራሽነት የሚሰፋበት፣ ሀገር በቀል ሀብት ማሰባሰብ ተግባራት የሚከናወኑበት፣ የሀገር ውስጥ የመድሃኒት አቅርቦት ለማሳደግ ብሎም የተጀመሩ የመሰረተ ልማት ስራዎች የሚጠናቀቁበት አመት እንደሚሆን ዶ/ር መቅደስ ተናግረዋል።
በ – አክረም ኑርያ












