በጀርመን ቡንደስ ሊጋ የመጀመሪያ ሳምንት ጨዋታ ሻምፒዮኑ ባየር ሙኒክ ከአርቢ ላይብዚሽ ምሽት 3 ሰዓት ተኩል የሚያደርጉት ፍልሚያ ተጠባቂ ሆኗል።

ባየርን ከአማካኝ መስመር ተጫዋቾቹ ጀማል ሙሲያላ እና ኮንራድ ላይመር ውጪ ሙሉ የቡድን ስብስባቸው በመልካም ጤንነት ላይ እንደሚገኝ ተዘግቧል።
አሰልጣኝ ቪንሰንት ካምፓኒ በዝውውር ገበያው ከሊቨርፑል ልዊስ ዲያዝ ውጪ የገዘፈ ስም ያለው ተጫዋች እስካሁን ያላስፈረመ ሲሆን፤ ለኮሎምቢያዊው የክንፍ ተጫዋች የመጫወት ዕድል ይሰጠዋል ተብሎ ይጠበቃል።
ቤንጃሚን ሼሽኮን ለማንችስተር ዩናይትድ የሸጠው አርቢ ላይብዚሽ ያለ ወሳኝ አጥቂ ወደ ሜዳ የሚገባ ይሆናል።
ሌላኛው ወደ ቼልሲ ይጓዛል በሚል ስሙ በስፋት እየተዘገበ የሚገኘው ቫቪ ሲሞንስ ምን አልባትም በላይብዚሽ ማለያ የመጨረሻውን ጨዋታ ያደርጋል ተብሎ እየተዘገበ ይገኛል።
ቡንደስ ሊጋው ነገም ሲቀጥል በዋንጫ ፉክክር ውስጥ ከሚጠበቁት ቡድኖች መካከል ባየር ሊቨርኩሰን በሜዳው ሆፈናይምን የሚያስተናግድ ሲሆን፤ ቦሩሲያ ዶርትሞንድ ከሜዳው ውጪ ሴንት ፓውሊን የሚገጥም ይሆናል።
በ-አልፈሪድ ነስሮ












