በተጠናቀቀው የ2017 በጀት አመት 3 ነጥብ 165 ሚሊየን ቶን ተኪ ምርቶችን በማምረት 4 ነጥብ 534 ቢሊየን ዶላር ማዳን መቻሉን የኢንዱስትሪ ሚኒስቴር አስታወቀ፡፡
የኢንዱስትሪ ሚኒስቴር የህዝብ ግንኙነትና ኮሙኒኬሽን ሥራ አስፈጻሚ አበባ ታመነ እንደገለጹት፤ መንግስት በአገር ውስጥ ምርትን ለማሳደግ ተኪ ምርቶች ላይ በትኩረት እየሰራ ነው።
በ2016 በጀት አመት 2 ነጥብ 661 ሚሊየን ቶን በማምረት 2 ነጥብ 844 ቢሊየን ዶላር የውጭ ምንዛሬ ማዳን ተችሎ እንደነበር ጠቅሰው፤ በ2017 በጀት አመት 3 ነጥብ 165 ሚሊየን ቶን ተኪ ምርቶችን በአገር ውስጥ በማምረት 4 ነጥብ 534 ቢሊየን ዶላር ማዳን መቻሉን ገልጸዋል፡፡
በተጠናቀቀው በጀት አመት ለአምራች ኢንዱስትሪው 672 ሺህ 190 ኪሎ ዋት የሀይል አቅርቦት መደረጉን በመግለጽ፤ ለአምራች ኢንዱስትሪው 681 ነጥብ 83 ሚሊየን ዶላር የውጪ ምንዛሬ መቅረቡንም ተናግረዋል፡፡
የአምራች ኢንዱስትሪው ዘርፍ የማምረት አቅም 65 ነጥብ 02 በመቶ መድረሱን ጠቅሰው፤ በዘርፉ በተጠናቀቀው በጀት አመት 352 ሺህ 513 ዜጎች የሥራ እድል መፍጠር መቻሉን ጠቁመዋል፡፡
በዘርፉ የጥራጥሬና የፋብሪካ ውጤቶች የግብዓት አቅርቦትን ለማሻሻል የሚረዱ ተግባራት መከናወናቸውን በመግለጽ፤ ከቆዳና ሌጦ ውጪ 17 ሚሊየን ቶን በላይ መቅረቡን ገልጸዋል፡፡ በተጠናቀቀው በጀት አመት ለአምራች ኢንዱስትሪው 14 ሚሊየን ጥሬ ቆዳና ሌጦ ግብዓት መቅረቡን ጠቁመዋል ሲል የዘገበው ኢፕድ ነው፡፡












