በአዲስ አበባ የተከናወኑ የልማት ስራዎች ከተማዋን ለነዋሪ ምቹ ለጎብኝዎች ሳቢ ለማድረግ ማስቻሉን ከንቲባ አዳነች አቤቤ ገልጸዋል።
ከንቲባዋ ይህንን የተናገሩት በከተማዋ የተገነቡ ገበያ ማዕከል እና የመኪና ማቆሚያ መርቀው ለአገልግሎት ክፍት ባደረጉበት መድረክ ነው።

ዛሬ ተመርቀው ወደ አገልግሎት የገቡት በባሻ ወልዴ የተገንባው ስኬት የገበያ ማዕከልና መኪና ማቆሚያ፣ የአፍሪካ ህብረት የገበያ ማዕከልና ፓርኪንግ፣ የሜክሲኮ ተሽከርካሪ ማቆሚያዎች ይገኙበታል።
በመድረኩ ንግግር ያደረጉት የአዲስ አበባ ከንቲባ አዳነች አቤቤ በቆርቆሮና በባነር ተሸፍኖ የነበረውን የአካባቢውን ገጽታ የቀየረ መሆኑን ተናግረዋል። በ2017 ዓ.ም ወደ 19 ሺህ የሚጠጉ ፕሮጀክቶች መጠናቀቃቸውን የተናገሩት ከንቲባ አዳነች የከተማዋን ገጽታ በመቀየር፤ ለማህበረሰቡ የስራ ዕድል መፍጠራቸውን ገልጸዋል።

ከሜክሲኮ እስከ ለገሀር 13 የተሽከርካሪ ማቆሚያምች መገንባታቸው በማንሳት በአንድ ጊዜ 2ሺህ 145 ተሽከርካሪዎችን ማስተናገድ እንደሚችሉ ተናግረዋል።
በ-ሰላም ይልማ












