የአዲስ አበባ ከተማ ስራ አስኪያጅ ጽ/ቤት በተጠናቀቀው የበጀት ዓመት የስራ አፈጻጸሙ ከተጠሪ ተቋማት፣ ከክፍለ ከተማ ስራ አስኪያጆችና ከባለድርሻ አካላት ጋር በመገምገም በ2018 በጀት አመት ቀጣይ የትኩረት አቅጣጫዎች ላይ እየመከረ ይገኛል።
በምክትል ከንቲባ ማዕረግ የአዲስ አበባ ከተማ ስራ አስኪያጅ ወንዱሙ ሴታ ባለፈው የበጀት ዓመት በበርካታ ዘርፎች አመርቂ ውጤት ተመዝግበዋል ብለዋል።

4 ነጥብ 9 ሚሊዮን ብር ወጪ በማድረግ ለአቅመ ደካማዎች የቤት እድሳት በ2017 በጀት ዓመት የተደረገ ሲሆን ወላጆቻቸው ላጡ ህፃናት ከ152ሺ ብር በላይ ፈሰስ በማድረግ ድጋፍ መደረጉ በመድረኩ ተመላክቷል።
3 ነጥብ 1 ሚሊዮን የአዲስ አበባ ከተማ ነዋሪዎች የፋይዳ ምዝገባ ማካሄዳቸው ሲገለፅ በከተማዋ የነበረውን የፋይዳ ምዝገባ ሽፋንን ወደ 6 ነጥብ 5 ሚሊየን ማሳደግ ስለመቻሉ ተነግሯል። የአዲስ አበባ ከተማን ውብ ፅዱ እና ማራኪ እንድትሆን ለማስቻል በደረቅ ቆሻሻ አወጋገድ ዙሪያ የተለያዩ ተግባራት መከናወናቸው ተገልጿል።
በከተማ እና በቤት ለቤት ፅዳት አገልግሎት የማህበረሰቡን ጤንነት ብሎም የከተማዋን ውብት ከማስጠበቅ ባለፈ ቆሻሻን መልሶ ጥቅም ላይ ለማዋል ጥረቶች እየተደገ ይገኛል። በዚህም ቆሻሻን መልሶ ጥቅም ላይ የማዋል ምጣኔ ከ11 በመቶ ወደ 12 ነጥብ 2 በመቶ ያደገ ሲሆን 1 ነጥብ 6 ቢሊየን ብር ማግኘት መቻሉን በምክትል ከንቲባ መዕረግ የአዲስ አበባ ከተማ ስራ አስኪያጅ ወንዱሙ ሴታ ተናግረዋል።
ባለፈው በጀት ዓመት ከ5700 በላይ ለሆኑ አመራሮችና ፈጻሚዎች የክህሎትና ሌሎች ስልጠናዎችን እንዲወስዱ በመድረኩ ተነስቷል። ጽ/ቤቱ በ2018 በጀት ዓመት የኮንስትራክሽን ተረፈ ምርት አያያዝን ማዘመን እና የስራ ደህንነት ማስጠበቅ፣ የአደጋ መከላከል እንዲሁም የከተማዋን ፅዳት ማስጠበቅ የትኩረት አቅጣጫዎቹ መሆናቸውን አስታውቋል።
ባለፈው በበጀት አመት የላቀ አፈጻጸም ላስመዘገቡ የተጠሪ ተቋማት፣ የክፍለ ከተሞች፣ ባለድርሻ አካላት እና ሚዲያዎች እውቅና ተሰጥቷቸው።
በ ሀሴት ኃይሉ












