ከ2025 እስከ 2050 የሚተገበር የኮንስትራክሽን ኢንደስትሪ ትራንስፎርሜሽን ኢኒሸቲቭ ማብሰሪያ መርሃ ግብር እየተከናወነ ይገኛል።

ለሚቀጥሉት 25 አመታት ይተገበራል የተባለው ኢኒሸቲቩ በሀገሪቱ ውስጥ በኮንስራክሽን ዘርፍ የሚስተዋሉ የጥራት፣የፍጥነት በተጨማሪም ሌሎች ችግሮችን ለመቅረፍ ትልቅ አስተዋፅኦ እንደሚኖረው ታምኖበታል።
ይፋ ማድረጊያ መርሃ ግብሩ ላይ የተገኙት ምክትል ጠቅላይ ሚኒስትር ተመስገን ጥሩነህ የኮንስትራክሽን ዘርፉ በኢትዮጵያ የ3 ሺህ አመታት ታሪክ እንዳለው ገልፀው ይሁን እንጂ አሁን ያለው የግንባታ ሂደት ከታሪካችን ጋር የተጣላ ነው ሲሉ በዘርፉ የሚስተዋሉ ችግሮች በርካታ መሆናቸውን ገልፀዋል።
ባለፉት ጊዜያት በየቦታው የሚጣሉ የመሰረት ድንጋዮች ብሎም ተጀምረው የሚቆሙ ህንፃዎች እንደማይኖሩ በአፅንኦት ተናግረዋል።
ዘርፉ በውስብስብ ችግሮች ምክንያት በሚጠበቀው ልክ አለማደጉን ገልፀው ባለፉት አመታት መንግስት ለዘርፉ በሰጠው ትኩረት መሻሻሎች መመዝገባቸውን አስረድተዋል።
የከተማና መሰረተ ልማት ሚኒስትር ጫልቱ ሳኒ በበኩላቸው ይህ ኢኒሸቲቭ ለግንባታ ግብዓት የሚሆኑ ከውጭ የሚገቡ መሳሪያዎችን በሀገር ውስጥ ለመተካት በተጨማሪም በዘርፉ ቴክኖሎጂን ለመጠቀምና በሀገር አቀፍ ደረጃ ያለውን አበርክቶ ለማሳደግ እንደሚረዳ አመላክተዋል።

ሚኒስትሯ አክለውም በቀጣይ አመታት 20 ተቋራጭ ድርጅቶች ከሀገር አልፈው በአህጉር አቀፍ ደረጃ ተወዳዳሪ እንዲሆኑ ለማድረግ እንደሚሰራ ጠቁመዋል።
በ – አክረም ኑርያ












