NBC Ethiopia
June 19, 2025
ከተቋረጠ ከዘጠኝ ዓመታት በኋላ በጅማ ከተማ አስተናጋጅነት አየተካሄደ የሚገኘው የመላው ኢትዮጵያ ጨዋታ ዛሬ በ2ኛ ቀን መርሐ ግብር ሲቀጥል በወንዶች እግር ኳስ ትግራይ ክልል ሶማሌ ክልልን 2-0 ፣ ማዕከላዊ ኢትዮጵያ ክልል ደቡብ ምዕራብ ክልልን 1-0 አሸንፈዋል።

7 ክልሎች ተሳታፊ በሆኑበት የኢንተርናሽናል ቴኳንዶ ውድድር ከፍተኛ ግለት ያለው ፉክክር ሲደረግበት ዉሏል። በጂረን ትምህርት ቤት አየተካሄደ ባለው ፍልሚያው አማራና ኦሮሚያ የአንገት ለአንገት ትንቅንቅ በማድረግ ከሌሎች ክልሎች ነጥረው ጎልተው ወጥተዋል።
ስድስት ክልሎችን አማራ፡ ኦሮሚያ ፣ አፋር ፣ ጋምቤላ ፣ ማዕከላዊ ኢትዮጵያና አዲስ አበባን ባገናኘው ከ18 ዓመት በላይ ወንዶች በ60 ኪሎ ግራም ከ1-4ኛ ዳን ፍልሚያ ማዕከላዊ ኢትዮጵያና ከአማራ ክልል ለፍጻሜ ደርሰዋል። የኦሮሚያ ክልል የነሐስ ሜዳሊያውን አሸንፏል።
ኦሮሚያ አማራን በማሸነፍ ለፍጻሜው አልፎ የነበረ ቢሆንም አማራ ክልል ክስ በማስገባቱ የጨዋታው ቪዲዮ በይግባኝ ሰሚ ዳኞች ከታየ በኋላ ውጤቱ ለአማራ ተቀልብሷል።
አማራ የሜዳሊያ ደረጃ ውስጥ የገባው አፋርን በመርታት ሲሆን ኦሮሚያ በበኩሉ ጋምቤላን በሰፊ ልዩነት በማሸነፍ ነው።በፍጻሜው ነገ ከአማራ ጋር የሚፋለመው ማዕከላዊ ኢትዮጵያ አዲስ አበባን ካሸነፈ በኋላ በእጣ ነው ለፍጻሜው ያለፈው።
በሴቶች ከ18 ዓመት በላይ 58 ኪሎ ግራም የቀይ ቀበቶ ፍልሚያ አማራ ክልል ከ ኦሮሚያ ለፍጻሜ ደርሰው በኦሮሚያ አሸናፊነት ተጠናቋል።
የዚህ ፍልሚያ ዉሳኔም እንደ ወንዶቹ ሁሉ ቅሬታ ቀርቦበታል። አምስት ክልሎች ተሳታፊ በሆኑበት ፍልሚያው አማራ ማዕከላዊ ኢትዮጵያን፣ ኦሮሚያ ደግሞ የአዲስ አበባን አሸናፊ ደቡብ ምዕራብ ኢትዮጵያን በመርታት ነበር ለፍጻሜ የደረሱት። አራት ክልሎች በተሳተፉበት በሴቶች ከ17-18 ዓመት የቀይ ቀበቶ ፓተርን ውድድር ኦሮሚያ፡ አዲስ አበባና ማዕከላዊ ኢትዮጵያ ከአንድ እስከ 3 ያለውን ደረጃ ይዘው አጠናቀዋል።
አዲስ አበባ ደቡብ ምዕራብን ኦሮሚያ ማዕከላዊ ኢትዮጵያን በመጣል ነበር ለፍጻሜው የበቁት። ዳኞች ከአንዴም ሁለት ሶስት ጊዜ የወርቅ ሜዳሊያ አሸናፊውን ለመለየት መስማማት ከተሳናቸው በኋላ በመጨረሻም ኦሮሚያ በይግባኝ አሸንፏል።
በ-ይበልጣል ሰውነት (ከጅማ)












