:::::::::::::::::::::::::::
የሴቶችና ማህበራዊ ጉዳይ ሚኒስትር ዴኤታ ክብርት ሁሪያ አሊ የአለም ባንክ የፕላኔት ዲፓርትመንት ሪጅናል ዳይሬክተር አና ዌልንስታይንና ልዑካን ቡድናቸውን በጽ/ቤታቸው ተቀብለው አነጋግረዋል።
በውይይቱም፤ የአለም ባንክ እና የሴቶችና ማህበራዊ ጉዳይ ሚኒስቴር ካሏቸው በርካታ የጋራ ፕሮጄክቶች መካከል አንዱ በሆነው በግጭት በተጎዱ አምስት ክልሎች እየተተገበረ ባለው የ3R ፕሮግራም፣ በተገኙ ዋና ዋና ስኬቶችና ተያያዥ ጉዳዮች ዙሪያ የስራ ሃላፊዎቹ በሰፊው መክረዋል።
የሴቶችና ማህበራዊ ጉዳይ ሚኒስትር ዴኤታ ክብርት ሁሪያ አሊ በዚሁ ጊዜ በተለይ ፕሮግራሙ የጾታዊ ጥቃት ተጎጂዎች የጤና፣ የስነልቦና፣ የህግ ምክር ድጋፎችን በአንድ ማዕከል (one stop center) እንዲያገኙ መደረጉን እና በዚህም 1.8 ሚሊዮን የሚደርሱ ዜጎች ተጠቃሚ መሆናቸው ትልቅ ስኬት እንደሆነ ተናግረዋል። ለዚህም ባንኩ እያደረገ ላለው ሁለንተናዊ ድጋፍ ክብርት ሚኒስትር ዴኤታዋ አመስግነዋል።
የአለም ባንክ የፕላኔት ዲፓርትመንት ሪጅናል ዳይሬክተር አና ዌልንስታይን በበኩላቸው በአለም ባንክ በኩል በግጭት ምክንያት ፆታዊ ጥቃት የደረሰባቸውን ሴቶችና ህፃናት ለመደገፍ እና አገልግሎት ሰጪ ተቋማትን ለማጠናከር ከሚካሄደው የ3R ፕሮግራም በተጨማሪ ሌሎች የማህበራዊ ጥበቃ ስራዎች ውጤታማ እንዲሆኑ ያለው ቁርጠኝነት አረጋግጠዋል።
የአለም ባንክ በግጭት ምክንያት ፆታዊ ጥቃት ለደረሰባቸው ሴቶች የተቀናጀ ድጋፍ ከመስጠት እና ተቋማትን መልሶ የመገንባት ፕሮግራም በተጨማሪ በከተማ እና በገጠር ሴፍቲኔት ለዜጎች የማህበራዊ ጥበቃ ድጋፍ የሚያደርጉ ሌሎች ፕሮግራሞችን በመደገፍ ከሚኒስቴር መስሪያ ቤቱ ጋር በጋራ እየሠራ እንደሚገኝ ከሴቶችና ማህበራዊ ጉዳይ ሚኒስትር ማህበራዊ ትስስር ያገኘነው መረጃ ያመለክታል፡፡












