፨ ፨ ፨ ፨ ፨ ፨ ፨ ፨ ፨ ፨ ፨
አዲስ አበባ | ጥቅምት 05 2017| NBC ETHIOPIA- የአፍሪካ መከላከያ ሚኒስትሮች ጉባዔ የአፍሪካ የመከላከያ ሚኒስትሮች ጉባዔ “አፍሪካ በጠንካራ አንድነት፣ ለሁለንተናዊ ጸጥታና ሰላም” በሚል መሪ ቃል በአዲስ አበባ እየተካሄደ ይገኛል።
በጉባዔው መክፈቻ መርሃ-ግብር ምክትል ጠቅላይ ሚኒስትር ተመስገን ጥሩነህ፣የቀድሞው ጠቅላይ ሚኒስትር ኃይለማርያም ደሳለኝ፣ የመከላከያ ሚኒስትር አይሻ መሀመድ እና ከአፍሪካ ሀገራት የተወጣጡ የመከላከያ ሚኒስትሮች እየተሳተፉ ነው።
አህጉራዊ የጋራ ምክክር በማካሄድ የመፍትሔ ሀሳብ ማመንጨት ጉባዔው የተዘጋጀበት ዋና አላማ መሆኑ በመክፈቻ መርሃ-ግብሩ ተገልጿል።

በጉባዔው ምክትል ጠቅላይ ሚኒስትር ተመስገን ጥሩነህ ሽብርተኝነት፣ የድንበር ግጭት እና የእርስ በእርስ ጦርነት አፍሪካን እያመሳት እንደሚገኝ ተናግረዋል።
ከሰሀል ቀጠና እስከ አፍሪካ ቀንድ ድረስ ሰላም እና መረጋጋት አይስተዋልም ያሉት ምክትል ጠቅላይ ሚኒስትሩ ይህም እንደ አህጉር ሰላም ለማስፈር በህብረት እና በአንድነት አለመተባበራችን የሚያሳይ ነው ብለዋል።
ሰላም የሰፈነባትን አፍሪካን ዳግም ለመፍጠር የመከላከያ ሰራዊቶቻችን አቅም በማሳደግ ልንተባበር ይገባል ሲሉ ጥሪ አቅርበዋል።

የኢትዮጵያ መከላከያ ሰራዊት በአህጉሪቱ ሰላም እና ደህንነትን ለማስፈን ወታደሮቿን በማሰማራበት በቀጠናው ከፍተኛ አስተዋፅኦን እያበረከተች ትገኛለች ያሉት በአፍሪካ ህብረት የፖለቲካ ጉዳዮች እና የፀረ ሽብር ተጠሪ ባባቱንዴ አባዮሚ ናቸው።
ይህም ኢትዮጵያ በአህጉሪቱ ሰላምን ለማስፈን ያላትን ቁርጠኝነት እና የመከላከያ አቅሟን የሚያመለክት ነው ብለዋል ተጠሪው።
ለሶስት ተከታታይ ቀናት የሚቆየው ጉባኤው ተሳታፊዎች ሀገሮች ወታደራዊ ግብዓቶችንና ትጥቆችን በራስ አቅም ማሟላት በሚያስችሉ ጉዳዮች እና በዓለም አቀፍ የሰላም ማስከበር ተልዕኮ ዙሪያ በመምከር የመፍትሔ አቅጣጫ እንደሚቀመጡ ይጠበቃል።
በ-ሀሴት ሀይሉ
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Website – https://nbcethiopia.com/news/
Telegram-https://t.me/nbcethiopiatv












