፨ ፨ ፨ ፨ ፨
አዲስ አበባ | ሰኔ 11 2016| NBC ETHIOPIA-ከ1969 እስከ 1974 37ኛው የአሜሪካ ፕሬዝዳንት በመሆን ያገለገሉትን ሪቻርድ ኒክሰን የፖለቲካ ህይወት ገደል የከተተው የዋተር ጌት ቅሌት በሚል የሚታወቀው ወንጀል የተፈጸመው ከዛሬ 52 ዓመታት በፊት በትላንትናው እለት በጎርጎሮሳውያኑ 1972 ነበር፡፡ ነገሩ እንዲህ ነው፡፡ ሰኔ 17፣ 1972 ማለዳ የዲሞክራቲክ ብሄራዊ ኮሚቴ ቢሮ በዘራፊዎች ተሰበረ ተባለ፡፡ መገኛው በዋሽንግተን ዲሲ ባለስልጣናት ለመኖሪያነት፣ ተቋማት ደግሞ ለቢሮነት በሚጠቀሙት በዝነኛውና ተመራጩ ዋተር ጌት ኮምፕሌክስ ነበር፡፡በወንጀሉ የተጠረጠሩ አምስት ግለሰቦች ካሜራዎች፣ የእስክሪፕቶ መጠን ያላቸው ሶስት አስለቃሽ ጋዝ መርጫዎች፣ የተራቀቁ የኤሌክትሮኒክስ መሳርያዎችና ለወንጀሉ የሚያግዟቸው መሳሪያዎችን እንደያዙ በፖሊስ ቁጥጥር ስር መዋላቸው ተሰማ፡፡
ከግለሰቦቹ መካከል ሶስቱ ኩባውያን፣ አንዱ አሜሪካዊ ዜግነት ያለው ኩባዊ ሲሆኑ የቀረው ጄምስ ደብሊው ማክኮርድ ጁኒየር የተሰኘ የቀድሞ የሲአይኤ ወኪል ነበር፡፡ በተደረገው ተጨማሪ ምርመራ ጄምስ ማክኮርድ በወቅቱ አሜሪካን በፕሬዝዳንትነት እያስተዳደሩ የነበሩት ፕሬዝዳንት ሪቻርድ ኒክሰን ለዳግም የስልጣን ዘመን የሚያደርጉትን እንቅስቃሴ የሚያስተባብረው አስመራጭ ኮሚቴ የደህንነት አስተባባሪ መሆኑ ተደረሰበት፡፡
“ፀረ-ኮምኒስቶች” ናቸው የተባሉት አምስቱ ተጠርጣሪዎች ከባድ የስርቆት ወንጀል እና የወንጀል መገልገያዎችን በመያዝ ወንጀልን ጨምሮ በስምንት ክሶች ተከሰሱ። ፕሬዝዳንቱ ቢያስተባብሉም የእሳቸው የቅርብ ሰው የሆኑና ከወንጀሉ ጋር ንክኪ አላቸው የተባሉ 69 ሰዎች በወንጀሉ ተጠርጥረው የምርመራ አድማሱ ሰፋ፡፡

በእዚሀ መካከል ዘ ዋሺንግተን ፖስት ራሱ ነጩ ቤተ-መንግስት እና የፕሬዝዳንቱ ዳግም አስመራጭ ኮሚቴ ሳይቀር በድርጊቱ እጃቸው እንዳለበት ያረጋግጣሉ ያላቸውን ማስረጃዎች ይፋ አደረገ፡፡ ማስረጃው ኮሚቴው ለፕሬዝዳንቱ ዳግም መመረጥ የሚሰሩ በድብቅ የቀጠራቸው ሰላዮችና ለእዚህ ዓላማ ማስፈጸሚያ የሚሆን ሚስጥራዊ ፈንድ መኖሩን ጭምር የሚያሳይ ነበር፡፡
እነኚህ መረጃና ማስረጃዎች ብሎም በጉዳዩ ላይ የሚካሄደው ምርመራ እየሰፋ ቢመጣም ፕሬዝዳንት ሪቻርድ ኒክሰንን ለዳግም ስልጣን ከማሸነፍ አላገዳቸውም ነበር፡፡ ለእዛውም 60 ነጥብ 7 በመቶ በሆነ ከፍተኛ ድምጽ፡፡
በዋተርጌቱ ዝርፊያ ዋነኛ ተዋናይ መሆናቸውን ያመኑት አምስቱ ግለሰቦችን ጨምሮ በአጠቃላይ 48 ተጠርጣሪዎች ጥፋተኛ ተብለው ቅጣት ተላለፈባቸው፡፡
የኒክሰን አስተዳደርም ቢሆን ወንጀሉን ለመሸፋፈን ሲጥር እንደነበር ራሱ ፍርድ ቤቱ ሳይቀር ኮንኖ ነበር፡፡ ፕሬዝዳንቱ በጥርጣሬ አይን እየታዩና አንዱ አንዱን ተጠያቂ እያደረገ ጉዳዩ በቀላሉ መቋጫ አጣ፡፡
ከጉዳዩ ጋር ግንኙነት ይኑረው አይኑረው ባይገለጽም ጠቅላይ አቃቤ ህጉ እና የነጩ ቤተ-መንግስት ሁለት ከፍተኛ አማካሪዎች ስራቸውን ለቀቁ፣ አማካሪውም ከስራቸው ተባረሩ።
የኒክሰን ዳግም አስመራጭ ኮሚቴ በፖለቲካዊ ስለላ፣ በህገወጥ ጥቅማጥቅሞች እና ሌሎች ህገ-ወጥ ተግባራት ላይ መሳተፉን የሚገልጹ ማስረጃዎች ተጋለጡ፣በነጩ ቤተ-መንግስት ትልቅ ውጥረት ሰፈነ፡፡
ፕሬዝዳንቱ ከከፍተኛ ሃላፊዎች፣ ከቤተ-መንግስቱ ሰራተኞችና ከቤተሰቦቻቸው ጋር በቤተ-መንግስቱ ያደረጓቸው ንግግሮች ቅጂ ላይ ምርመራ ቢደረግም ሃቁ ሊደረስበት አልቻለም፡፡ በጊዜ ሂደት ፕሬዝዳንት ኒክሰን በህዝቡ ዘንድ ያላቸው ተዓማኒነት እየተሸረሸረ ሄደ፡፡
የተወካዮች ምክር ቤቱ የዳኝነት ኮሚቴ በፕሬዚዳንት ኒክሰን ላይ በፍትህ ማፈን፣ ስልጣንን አላግባብ በመጠቀም እና በክስ ሂደቱ ላይ እንቅፋት በመፍጠር በሚል ክስ አቀረበበት፡፡

ክሱ ምክር ቤቱ አንድ የመንግስት ባለስልጣንን ከስልጣኑ ለማንሳት የሚወስደው የመጀመሪያው ወሳኝ እርምጃ ነው። አማራጭ ያጡት ፕሬዝዳንቱ ቅጂዎቹን አስረከቡ፡፡
ይሄኔ ፕሬዝዳንቱ የዋተርጌቱ ምርመራ እንዲቆም እንዲያደርግ ለFBI ትዕዛዝ ሲሰጡ የሚያሰማን ድምጽ ቅጂዎቹ አጋለጡ፡፡ ከአራት ቀናት በኋላም ፕሬዝዳንት ኒክሰን በዩናይትድ ስቴትስ ታሪክ ስልጣን የለቀቁ የመጀመሪያው ፕሬዝዳንት ሆነው በገዛ ፈቃዳቸው ስልጣናቸውን ለቀቁ፡፡ ተተኪያቸው ፕሬዝዳንት ጄራልድ ፎርድ ከማንኛውም የወንጀል ክስ ይቅርታ አድርገውላቸው ከቅጣት ተረፉ፡፡ በዋተርጌቱ ቅሌት በአጠቃላይ 69 ግለሰቦች ክስ ተመስርቶባቸው 48ቱ ጥፋተኛ ሆነው ተገኝተዋል።ከዛሬ 52 ዓመታት በፊት ልክ በትላንትናው እለት የተፈጸመውን የዋተር ጌቱን ቅሌት ከታሪክ ማህደር መዘን እንዲህ አስቃኘናችሁ፡፡












