አዲስ አበባ |ታህሳስ 04፤ 2016| NBC ETHIOPIA – ከሰሞኑ ሜዳ ውስጥ ድብደባ የተፈጸመባቸው የቱርክ ሱፐር ሊግ ዳኛ ኡሙት ሜለር ከሆስፒታል ከወጡ በኋላ ለመጀመሪያ ጊዜ ስለሁኔታው አስረድተዋል።

ዳኛው በ15ኛ ሳምንት የሊጉ መርሐ ግብር አንካራጉቹ ከ ሪዝስፖር 1-1 በተለያዩበት ጨዋታ በባለሜዳው ቡድን ፕሬዝዳንትና በደጋፊዎች ድብደባ እንደተፈጸመባቸው ይታወሳል።
ድብደባው እንግዳው ክለብ ሪዝስፖር በ96ኛው ደቂቃ የአቻነቷን ጎል ካስቆጠረ በኋላ በፕሬዝዳንቱ ቡጢ ነበር የተጀመረው።
ሜለር ለ3 ቀናት ያህል የህክምና ክትትል ሲደረግላቸው ቆይተው ከሆስፒታል መውጣታቸው ተሰምቷል።
የ37 ዓመቱ ዳኛ ከሆስፒታል ከወጡ በኋላ ለመጀመሪያ ጊዜ ለመገናኛ ብዙሐን በሰጡት ቃለ ምልልስ፣ አሁን ላይ በጥሩ የጤና ሁኔታ ላይ እንደሚገኙና ጉዳዩን ወደ አውሮፓ እግር ኳስ ማሕበር መውሰዳቸውን ተናግረዋል።
“አሁን ላይ ምንም የጤና እክል የለብኝም፣ ከአውሮፓ እግር ኳስ ማሕበር ተደውሎልኝ ነበር፣ ሁሉም ነገር ያጋጥማል፣ እኔ የምፈልገው ወደ ቤቴ መሄድና ዕረፍት ማድረግ ነው” ብለዋል።
ህክምናቸውን ሲከታተሉ የቆዩበት የአንካራ ሆስፒታል በበኩሉ፣ ዓይናቸው ዉስጥ ካለው ትንሽ እብጠት በስተቀር ምንም ችግር እንደሌለባቸው አረጋግጧል።
የአገሪቱ እግር ኳስ ፌዴሬሽን አስቸኳይ ስብሰባ ካደረገ በኋላ፣ ጥፋቱን የፈጸሙ አካላት ጠንከር ያለ የቅጣት ዉሳኔ እንዲተላለፍባቸውና ኡሙት ሜለር በቶሎ ወደ ስራቸው እንዲመለሱ ወስኗል።
የፊፋ ፕሬዝዳንት ጂያን ኢንፍንቲኖ፣ ክስተቱን “በምንም አግባብ ተቀባይነት የሌለው” ብለውታል።
ይህ በእንዲህ እንዳለ፣ በዚህ ክስተት ምክንያት ተቋርጦ የነበረው የቱርክ ሱፐር ሊግ ከአምስት ቀናት በኋላ እንደሚመለስ ተነግሯል።
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Website – https://nbcethiopia.com/news/
Telegram-https://t.me/nbcethiopiatv












