
የኢፌዲሪ ፌዴሬሽን ምክር ቤት አዲሷ አፈ ጉባኤ ወ/ሮ ሙፈሪሃት ካሚል ከቀድሞው የምክር ቤቱ አፈ ጉባኤ አቶ አገኘሁ ተሻገር ጋር የሥራ ርክክብ አደረጉ።
በሥራ ርክክቡ ወቅት አዲሷ አፈ ጉባኤ የተከበሩ ወ/ሮ ሙፈሪሃት ካሚል፣ ምክር ቤቱ በአገራዊ ለውጡ ሂደት የጀመረውን የሪፎርም ሥራ በማጠናከር ተቋሙ የተሰጠውን ሕገ መንግሥታዊ ኃላፊነት በብቃት እንዲወጣ ትኩረት ሰጥተው እንደሚሠሩ ገልጸዋል።
አፈ ጉባኤዋ ከምክር ቤቱ ቀጣይ የሥራ አቅጣጫዎች መካከል አገራዊ አንድነትንና ዘላቂ ሰላምን ማጠናከር፣ ውጤታማ የፊስካል ሽግግርንና ፍትሐዊ የሀብት ክፍፍልን ማረጋገጥ፣ የሕገ መንግሥት የበላይነትንና ሕገ መንግሥታዊነትን ማስከበር እንዲሁም የምክር ቤቱን ተቋማዊ የመፈጸም አቅም ማጎልበት ትኩረት የሚሰጣቸው መሆኑን አስታውቀዋል።
አፈጉባኤዋ አክለውም ምክር ቤቱ የሕገ መንግሥቱን መርሆች በማስከበር፣ በፌዴራል ሥርዓቱ ውስጥ የሚኖሩ የሥልጣንና የሀብት ክፍፍል ጉዳዮችን በሕጋዊና በተቋማዊ አግባብ ለመፍታት የሚያስችለውን አቅም በማጠናከር ለውጤታማ የፌዴራል ሥርዓት ግንባታ የራሱን ድርሻ እንደሚወጣ ጠቁመዋል።
የሥራ ርክክቡ የምክር ቤቱን ቀጣይ የሥራ አቅጣጫ በማስቀመጥና በቀድሞው አመራር የተጀመሩ የተቋም ሥራዎችን በተገቢው ሁኔታ በማስቀጠል ረገድ የሥልጣን ሽግግሩን ለማሳለጥ ያለመ መሆኑም ተገልጿል።
የሥራና ክህሎት ሚኒስትር፣ የሕዝብ ተወካዮች ምክር ቤት አፈጉባኤ፣ የሰላም ሚኒስትር፣ የሕዝብ ተወካዮች ምክር ቤት የትራንስፖርት ጉዳዮች ቋሚ ኮሚቴ ሰብሳቢ፣ የሴቶች ጉዳይ ሚኒስትር በመሆን ያገለገሉት ወ/ሮ ሙፈሪሃት ካሚል፥ ከመስከረም 25 ቀን 2019 ዓ.ም ጀምሮ የፌዴሬሽን ምክር ቤት አፈጉባኤ ሆነው ሲመረጡ፥ አቶ ደስታ ሌዳሞ ደግሞ ምክትል አፈ ጉባኤ ሆነው መመረጣቸው ይታወሳል።












