
የኢትዮጵያን ብሄራዊ ጥቅም ለማስጠበቅ የጋራ አቋም ሊኖር እንደሚገባ የውጭ ጉዳይ ሚኒስትር ጌዲዮን ጢሞቴዎስ (ዶ/ር ) ገለጹ ።
6ኛው የሕዝብ ተወካዮች ም/ቤት 5ኛ ዓመት የስራ ዘመን 6ኛ መደበኛ ስብሰባ አካሂዷል። በዚህም የውጭ ጉዳይ ሚኒስትር ጌዲዮን ጢሞቲዎስ (ዶ/ር) ከምክር ቤት አባላት ለቀረቡላቸው ጥያቄዎች ምላሽ ሰጥተዋል።
በቀይ ባህር ጉዳይ ላይ የኢትዮጵያን አቋምና ፍላጎት እንዲሁም ጥያቄው ተገቢና ፍትሃዊ መሆኑን ለአለም አቀፍ ማህበረሰብ ማስገንዘብ መቻሉን አስታውቀዋል።
ኢትዮጵያ የባህር በር ለማግኘት የጀመረችው ጉዞ ይሳካ ዘንድ የሁሉም ርብርብ የሚጠይቅ ጉዳይ መሆኑን ተናግረዋል።
ይህ ወደብ የማግኘት ጉዳይ የመንግስት ወይም የአንድ ፓርቲ ጉዳይ ባለመሆኑ ያሉንን ልዩነቶች ወደ ጎን በመተው ብሄራዊ ጥቅማችንን ማስጠበቅ ይገባል ብለዋል።
ኢትዮጵያ ከጎረቤት ሀገራት ጋር ስላላት ዲፕሎማሲያዊ ግኑኝነት በተመለከተ ከምክር ቤት አባላት ለቀረበላቸው ጥያቄ ምላሽ የሰጡት ሚኒስትሩ ፣ ኢትዮጵያ ከአብዛኛዎቹ የቀጠናው ሀገራት ጋር መልካም የሚባልና በጋራ ተጠቃሚነት ላይ የተመሰረተ ግንኙነት እንዳላት አብራርተዋል ።
ይሄንን ጠንካራ ግኑኝነት ይበልጥ ለማጠናከር በመሰረተ ልማት ለማስተሳሰር እየተሰራ መሆኑን አንስተዋል ።












