በሀረሪ ክልል ለጤናው ዘርፍ ተደራሽነትና ጥራትን ለማሳደግ በትኩረት እየተሰራ መሆኑን የሀረሪ ክልል ርዕሰ መስተዳድር ኦርዲን በድሪ ገልጸዋል፡፡
በሀረር ከተማ በ96 ሚሊየን ብር ወጪ የተገነባው ሪጅናል ላቦራቶሪ በዛሬው ዕለት ተመርቆ ለአገልግሎት ክፍት ሆኗል።
ለአገልግሎት ክፍት የተደረገው ሪጅናል ላቦራቶሪም የጤና አገልግሎት ደረጃን የሚያሳድግና ከክልሉ ባለፈ የአጎራባች አካባቢ ማህበረሰብን ተጠቃሚ የሚያደርግ መሆኑን አንስተው፤ ላቦራቶሪው በሙሉ አቅም አገልግሎት እንዲሰጥ ክትትልና ድጋፍ ይደረጋል ብለዋል።

የጤና ሚኒስትሯ ዶ/ር መቅደስ ዳባ በሀገሪቱ ባለፉት ሰባት ዓመታት 28 የላቦራቶሪዎች ተገንብተው አገልግሎት እየሰጡ መሆናቸውን የጠቆሙ ሲሆን ውስብስብ ምርመራዎችን በማድረግ የጤናውን ዘርፍ አቅም ለማጎልበት ከፍተኛ ድርሻ እንዳላቸው አብራርተዋል።

የክልሉ ጤና ቢሮ ኃላፊ ዶ/ር አብዲ አሚን ሪጅናል ላቦራቶሪው ከዚህ ቀደም አገልግሎቱን በሚፈልጉ ዜጎች ላይ ሲደርስ የቆየውን እንግልትና ወጪን እንደሚያስቀር ተናግረዋል። ጤና ሚኒስቴር እና ከሀረሪ ክልል ጤና ቢሮ ጋር በመተባበር የተገነባው ሪጅናል ላቦራቶሪው፤ የምርመራ አቅምን በማሳደግ የክልሉን የጤና ዘርፍ ለማጎልበት እንደሚያግዝም ተገልጿል።












