።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።።
“አንድ ተጫዋች ብቻውን ቡድን አይሆንም” የሚለው አባባል፣ ከምንጊዜውም በላይ ዛሬም እውነት ነው።
እንደ ሊዮኔል ሜሲ እና ክርስቲያኖ ሮናልዶ ያሉ ኮከቦች እንኳን፣ ከዚህ በፊት ታይቶ ወደማይታወቅ ከፍተኛ ደረጃ ለመድረስ የቡድን አጋሮቻቸው ድጋፍ ያስፈልጋቸው ነበር። ራይስ በአርሰናል ታሪክ ከፍተኛ ክፍያ ከሚያገኙ ተጫዋቾች አንዱ (ከሌላ ተጫዋች ጋር እኩል) ሊሆን ተቃርቧል።
ምንም እንኳን ምርጥ ተጫዋቾች ጨዋታውን ብቻቸውን የሚቆጣጠሩ ቢመስሉም፣ ሜዳ ላይ አብረዋቸው ከሚጫወቱት እና ለጋራ ዓላማ ከሚታገሉት ከሌሎቹ 10 አጋሮቻቸው ውጪ ግን ምንም አይደሉም።
እርግጥ ነው፣ አንዳንድ ተጫዋቾች ወደ ቡድን ሲቀላቀሉ የቡድኑን አቅም በእጅጉ ሊያሳድጉ ይችላሉ፤ ለአርሰናል ዴክላን ራይስን ማስፈረም ለዚህ ግልጽ ማሳያ ነው።
እ.ኤ.አ. በ2023 ክረምት፣ አርሰናል (የሰሜን ለንደኑ ክለብ) የዌስት ሃሙን አምበል በሪከርድ ዋጋ 105 ሚሊዮን ፓውንድ ሲያስፈርም፣ ቡድኑ ቀድሞውንም በእድገት ላይ ነበር። በወቅቱ ይህ የዝውውር ዋጋ ጥያቄ አስነስቶ የነበረ ቢሆንም፣ በአሁኑ ወቅት 27 ዓመቱ የሆነው ራይስ ለቡድኑ መሻሻል ዋና ምክንያት እንደሆነ አሁን ላይ አጠያያቂ አይደለም።
በኮከብ ተጫዋቾች በተሞላው በዚህ ቡድን ውስጥ፣ ክለቡ ዴክላን ራይስን ከቡካዮ ሳካ ጋር እኩል፣ በክለቡ ታሪክ ከፍተኛው ክፍያ የሚያገኝ ተጫዋች እንዲሆን አዲስ ውል ያዘጋጀበት ምክንያት አለ።
እንደሚነገረው ከሆነ፣ ራይስ በሳምንት 300,000 ፓውንድ የሚያገኝ ሲሆን፣ አዲሱ ውሉ እስከ 2031 ድረስ ይቆያል፤ በዚያን ጊዜም ተጫዋቹ 32 ዓመቱ ይሆናል።
አርሰናል ይህንን አማካይ ተጫዋች ቢያንስ እስከ 2031 ድረስ በቡድኑ ውስጥ ለማቆየት አቅዷል።ሚኬል አርቴታም ከክለቡ ጋር አዲስ የረጅም ጊዜ ውል በመፈረሙ፣ ራይስ ቀደም ሲል የለመደውን እና ለአርሰናል ከፈረመ ከጥቂት ሳምንታት በኋላ “ለየት ያለ ደረጃ” ሲል የገለጸውን የአሰልጣኝነት ጥራት ማግኘቱን መቀጠል ይችላል።
አርሰናልን በቅርበት ለሚከታተል ማንኛውም ሰው፣ ራይስ ለቡድኑ የሚያበረክተው አስተዋጽኦ እና ቡድኑ በተሳካ ሁኔታ እንዲንቀሳቀስ የሚያደርገው ሚና ግልጽ ነው። ለሙሉ 90 ደቂቃዎች ሜዳውን አቋርጦ በመሮጥ የሚያሳየው ጉልበት፣ በተለይም በጨዋታው ወሳኝ እና ትኩስ ጊዜያት የሚያሳየው የአካል ብቃት ጥንካሬ፣ እንዲሁም ጎል የማስቆጠር ችሎታው፤ ይህ አማካይ ተጫዋች የተሟላ ብቃት እንዳለው ያሳያሉ።
ነገር ግን፣ ራይስ የዘመኑ ምርጥ አማካይ ነው የሚለው አስተያየት በቁጥራዊ መረጃዎች ይደገፋል ወይ?
አስገራሚ ቁጥሮች
ለክለቡ ከፈረመበት ጊዜ አንስቶ በተለያዩ ውድድሮች 173 ጨዋታዎችን ያደረገ ሲሆን፣ 23 ጎሎችን አስቆጥሮ 34 ለጎል የሚሆኑ ኳሶችን አመቻችቶ ሰጥቷል፤ ይህ በእውነት አስደናቂ ውጤት ነው።
እስካሁን ባደረጋቸው ጨዋታዎች የተሰበሰበው 10,815 ደቂቃዎችም ትልቅ ቦታ የሚሰጠው ነው፤ ምክንያቱም ከእሱ ውጪ ይህን ያህል ደቂቃ የተጫወተ ሌላ ተጫዋች የለም።
በዚህ ቦታ ላይ ሆኖ፣ እንደ እሱ አይነት አጨዋወት የሚጫወት ተጫዋች እንዲህ አይነት አስተማማኝነት ማሳየቱ በዘመናዊው እግር ኳስ እጅግ ያልተለመደ ነገር ነው። ይህ ብቃቱ በ’ፍላሽስኮር’ (ላይ ከፍተኛ ደረጃ እንዲያገኝ አስችሎታል፤ ለምሳሌ አርሰናል በአንፊልድ ላለፉት 14 ዓመታት አሸንፎ የማያውቅበትን ድል ሲቀዳጅ፣ ራይስ 8.0 የሚደርስ ከፍተኛ ደረጃ አግኝቶ ነበር።
ጋብሪኤል ማጋልሃኤስ እና ዊሊያም ሳሊባ (በቅደም ተከተል 10,340 እና 10,220 ደቂቃዎች) ወደዚህ ቁጥር በመጠጋት ሁለተኛ እና ሶስተኛ ደረጃ ላይ ይገኛሉ፤ ከእነዚህ ሶስት ተጫዋቾች ውጪ 10,000 ደቂቃዎችን ያሳለፈ ሌላ ተጫዋች የለም።
ማርቲን ኦዴጋርድ (2,726) ብቻ ነው ራይስ ካደረጋቸው 2,410 የማጥቃት ክልል (final third) ውስጥ የተደረጉ ፓሶች የበለጠ ቁጥር ያስመዘገበው። እንዲሁም፣ ራይስ ከፈጠራቸው 207 የጎል እድሎች የበለጠ እድሎችን የፈጠሩት ሁለት ተጫዋቾች ብቻ ናቸው (ከእነዚህም አንዱ ሳካ ነው)።
ራይስ በአጠቃላይ 7,040 ፓሶችን ያደረገ ሲሆን፣ ከአርሰናል ተጫዋቾች መካከል ከእሱ የበለጠ ፓስ ለማድረግ የሞከረው ሳሊባ ብቻ ነው። ራይስ ካደረጋቸው ፓሶች ውስጥ 89.19% የሚሆኑት በትክክል ለተጫዋቾቹ የደረሱ ሲሆን፣ ይህ በቡድኑ ውስጥ ካሉት ምርጥ መመዘኛዎች አንዱ ነው (እዚህም ቢሆን ከሳሊባ በመቀጠል ሁለተኛ ደረጃ ላይ ይገኛል)።
ራይስ የወሰዳቸው 302 የማዕዘን ኳሶች ከማንኛውም ሌላ ተጫዋች ይበልጣሉ፤ አርሰናል ከቆሙ ኳሶች (dead-ball situations) የሚያገኘው ስኬትም በዋናነት በራይስ የኳስ አሰጣጥ ትክክለኛነት ምክንያት የመጣ ነው። በእርግጥ፣ ራይስ ከተመቻቹ የኳስ አጋጣሚዎች (set-plays) በመነሳት የፈጠራቸው 84 የጎል ዕድሎች፣ ከማንኛውም ሌላ ተጫዋች (ሳካ – 61) ቢያንስ በ23 ይበልጣሉ።
ኦዴጋርድ (40) እና ኖኒ ማዱዌኬ (11)፣ በዚህ ረገድ ቁጥራቸው ከ10 በላይ የደረሰ የአርሰናል ኮከቦች ቡድንን (አራት ተጫዋቾችን) ያሟላሉ።
ለ105 ሚሊዮን ፓውንድ በእርግጥም የሚገባ ተጫዋች ነው።
ከ10 ያርድ በላይ ርቀት የተደረጉ 267 ስኬታማ ረጅም ኳሶች ፣ ከቡድን አጋሮቹ ብቃት በእጅጉ የላቁ ናቸው፤ እንዲሁም ለሌሎች ያቀበላቸው 94 ኳሶች (layoffs)፣ በዚህ ዘርፍ አንደኛ ከሆነው ኦዴጋርድ (104) ያነሱት በ10 ብቻ ነው።
በአጠቃላይ 907 ጊዜ በአንድ ለአንድ ግንኙነቶች(duels) ውስጥ መሳተፉ በቡድኑ ውስጥ ከሳካ እና ከካይ ሃቨርትዝ ቀጥሎ ሦስተኛው ከፍተኛ ቁጥር ሲሆን፣ የራይስ የስኬት መጠን (54.36%) ግን ከሌሎቹ በእጅጉ የተሻለ ነው።
ኳስን መልሶ በማግኘት (ball recoveries) ረገድ፣ ይህ እንግሊዛዊ ተጫዋች የደረሰበትን 583 ድምር ውጤት ማንም ሊደርስበት አይችልም። በተጨማሪም፣ በመከላከል ረገድም ቢሆን፣ ከ2023/24 የውድድር ዘመን መጀመሪያ አንስቶ ያደረጋቸው 236 የኳስ መንጠቅ ሙከራዎች (tackles) እና 128 ኳስ የማቋረጥ (interceptions) ተግባራት ከማንኛውም የቡድን አጋሩ ይበልጣሉ።
ለሀገሩም ሆነ ለክለቡ፣ በጨዋታው የተለያዩ ቦታዎች ሁሉ እጅግ የተሟላ ብቃት ያለው ተጫዋች ለማግኘት ቢፈልጉ፣ እንደ ራይስ ያለ ተጫዋች ማግኘት በጣም ከባድ ነው።
ስለዚህ፣ አርሰናል ለዚህ ተጫዋች ከፍተኛ (ሪከርድ የሰበረ) ገንዘብ በማውጣቱ ውሳኔ ላይ ጥያቄ ያነሱ የነበሩ ሰዎች፣ አሁን ላይ ነገሩን እንደገና እንዲያጤኑት ራይስ አድርጓቸዋል፤ ምክንያቱም ይህ ዝውውር በአሁኑ ወቅት እጅግ አዋጭ እና ትርፋማ ሆኖ እየታየ ነው።
በ-ሳምሶን አበበ
። ። ።
ማስፈንጠሪያውን (ሊንኩን) በመጫን NBC ኢትዮጵያን ይጎብኙ ይወዳጁ
https://linktr.ee/NBCEthiopiaTV
#NBCEthiopia
#ሆኖ_መገኘት
#Ethiopia









