በአማራ ክልል የሚንቀሳቀሰው ራሱን “ፋኖ” ብሎ የሚጠራው ጽንፈኛው ቡድን መሬት ላይ ያለው እንቅስቃሴ በመንደር ጎበዝ አለቃዎች የሚመራ በመሆኑ፣ የክልሉ ሰላምና መረጋጋት ቀውስ ውስጥ እንዲገባ ምክንያት ሆኗል ተባለ።

በዚህም ጉዳይ ማርእሸት ፀሐዩ፥ በኤንቢሲ ኢትዮጵያ “ጊዜ ግስ” ፕሮግራም ላይ እንግዳ ሆኖ በመቅረብ ሰፊ ውይይት አድርጓል።
በአሁኑ ወቅት የፋኖ እንቅስቃሴ የተዋቀረ የፖለቲካ ዓላማ እና ግልጽ የሆነ ግብ ያጣ መሆኑን በማንሳት በየአካባቢው የተፈጠሩ አደረጃጀቶች ሕዝቡን ለአስከፊ ማህበራዊና ኢኮኖሚያዊ ጉዳት ከመዳረጋቸው ባሻገር፤ ህገ-ወጥ ድርጊቶች እንዲስፋፉም በር ከፍተዋል በማለት ገልጿል።
የሰሜኑን ጦርነት ተከትሎ በህወሓት እና በሻዕቢያ መካከል የተፈጠረው ኢትዮጵያን የማፍረስ ጥምረት በአማራ ክልል ላይ የደቀነው አደጋ ከፍተኛ እንደነበር ማርሸት አስታውሷል። ለአመታት ባላንጣ የነበሩት እነዚህ ሁለት የሽብር ኃይሎች በጋራ በመሰለፍ የሀገርን ሰላም ለማደፍረስ የሚሄዱበት ርቀት ያስታጠቃቸውን ኃይሎች ጨምሮ ህዝቡን ዋጋ ሲያስከፍል ሰንብቷል ብሏል።
በውጊያ መስክ ካሉት መካከል ጥይት ከመተኮስ ይልቅ የሰላም ድርድርን የሚጠብቁ በሺዎች የሚቆጠሩ የታጠቁ አባላት መኖራቸውንም ጠቁሟል። ሰራዊታቸው ከጥፋት መንገድ ወጥቶ ወደ ሰላማዊ ሕይወት ለመመለስ ዝግጁ ቢሆንም፥ የፖለቲካ ልሂቃኑና አመራር የሆኑት አካሄዳቸው ሰላም ጠል በመሆኑ ወደ ጦርነት አፋፍ ሲነዷቸው እንደሰነበቱም ገልጿል።

አቶ ማርእሸት አክለውም፥ መንግሥት በክልሉ የታጠቁ አካላትን በመገምገም ወደ ሰላማዊ ውይይትና ድርድር መምጣት እንዲችሉ በማሳሰብ የታጠቁ ሃይሎችም የጦርነትን አስከፊነት በመረዳት የሰላም አማራጮችን ብቸኛ ምርጫ በማድረግ ወደ ሰላም መድረስ እንዲችሉ ጥሪ አቅርቧል።
በ – የአብሥራ ተፈራ












