።።።።።።።።።።።።።።።።።።።።።።።።።።።።።።።።።።።።።።።።።።።።
የሊቨርፑል የቀድሞ ተከላካይ፣ ኡናይ ኤምሪ ከሚድላንድ ክለብ ለቀው ወደ ማንቸስተር ዩናይትድ ሊሄዱ እንደሚችሉ ጠቁሞ ነበር።
አስቶን ቪላ፤ የ‘ስካይ ስፖርትስ’ ተንታኝ እና የ‘ቴሌግራፍ’ አምደኛ በሆነው ጄሚ ካራገር ላይ፣ “ስለ ክለቡ እና ደጋፊዎቹ በተናገራቸው ተቀባይነት የሌላቸው ስድቦች” ምክንያት ህጋዊ እርምጃ ለመውሰድ ማቀዱን አስታወቋል።
አርብ ምሽት ዘግይቶ በወጣ መግለጫ፣ የክለቡ ተባባሪ ባለቤት ናሴፍ ሳዊሪስ፤ ካራገር በ‘ስቲክ ቱ ፉትቦል’ ፖድካስት ላይ በሰጠው አስተያየት ምክንያት በእሱ ላይ ክስ ለመመስረት ማቀዳቸውን ገልጸዋል።
አሰልጣኝ ኡናይ ኤምሪ ወደ ማንቸስተር ዩናይትድ ሊሄዱ ይችላሉ በሚለው ጉዳይ ዙሪያ፣ ካራገር የቪላ ደጋፊዎችን “አፋቸውን እንዲዘጉ” (በጣም ጸያፍ በሆነ አገላለጽ) መናገሩ በክለቡ እና በደጋፊዎቹ ዘንድ ከፍተኛ ቁጣን ቀስቅሷል።
አስቶን ቪላ በመግለጫው፡- “አስቶን ቪላ ስለ ክለቡ እና ደጋፊዎቹ በተናገራቸው ተቀባይነት የሌላቸው ስድቦች ምክንያት በጄሚ ካራገር ላይ ህጋዊ እርምጃ ይወስዳል።”
“አስቶን ቪላ በእንግሊዝ እና በአውሮፓ እግር ኳስ እያደረገ ያለውን እድገት ማንም እንዲያስተጓጉል አይፈቅድም።”በሊቀመንበሩ ናሴፍ ሳዊሪስ አማካኝነት አስታውቋል።
ካራገር ከሌሎች ተንታኞች ጋሪ ኔቪል፣ ኢያን ራይት እና ሮይ ኪን ጋር ባደረገው ውይይት፣ የእግር ኳስ ክለቦችን መጠን ወይም ደረጃ እያነጻጸረ ነበር። ማይክል ካሪክ ከማንቸስተር ዩናይትድ አሰልጣኝነት ቦታ ቢለቁ፣ ኡናይ ኤምሪ ቦታውን ሊረከቡ እንደሚችሉ ሲነገር ቆይቷል።
ካራገር ፡- “ኡናይ ኤምሪ በየዓመቱ የሚያሳየው ብቃት አስደናቂ ነው። ብዙ ለውጦች ሲኖሩ እና ተጫዋቾች ለመላመድ ጊዜ ሲፈልጉ፣ እሱ ግን ይህንን በየዓመቱ ያሳካል።ነገር ግን የቪላ ደጋፊዎችን ለመተቸት የምፈልገው፣ በዩሮፓ ሊግ እጅግ ስኬታማ የሆነ አሰልጣኝ… እስቲ አስቡት፣ ዩሮፓ ሊግን ሦስት ወይም አራት ጊዜ ያሸነፈ ሰው [ኤምሪ አምስት ጊዜ አሸንፈዋል]፣ በእርግጠኝነት ወደ ቻምፒዮንስ ሊግ ማነጣጠር ይፈልጋል።”
“አስቶን ቪላ መቼም ቢሆን ማንቸስተር ዩናይትድ ሊሆን አይችልም። በእኔ እይታ፣ በፒኤስጂ ወይም በአርሰናል ጥሩ ውጤት አላመጣም፤ ምናልባትም ይህ የሆነው በቡድኑ ውስጥ በነበሩት ተጫዋቾች ከፍተኛ ኢጎ (ትዕቢት/ራስ ወዳድነት) ወይም መሰል ምክንያቶች ሊሆን ይችላል።” “ነገር ግን፣ አንድ ትልቅ ክለብን እንደገና የማስተዳደር ዕድል በእርግጠኝነት ይፈልጋል። ወደዳችሁም ፣ ጠላችሁም ፣ በእግር ኳስ ውስጥ የራሱ የሆነ ተዋረድ አለ።
“ከአስተን ቪላ በታች ያሉ ቡድኖች ይኖራሉ፤ እነሱም የአስተን ቪላን ተጫዋቾች ወይም አሰልጣኝ ሊወስዱ ይችላሉ። ስለዚህ እናንተ የአስተን ቪላ ደጋፊዎች፣ አፋችሁን ዝጉ!”ብሏል።
በ-ሳምሶን አበበ












