:: :: :: :: :: :: :: ::
በአፋር ክልል የመስኖ ልማት የምግብ ዋስትናን ለማረጋገጥ እያገዘ መሆኑን የክልሉ ርዕሰ መስተዳድር አወል አርባ አስታወቁ።
ርዕሰ መስተዳድሩ በክልሉ ገቢ ረሱ ዞን በአዋሽ ፈንታሌ ወረዳ እየተከናወኑ ያሉ የልማት ስራዎችን በተመለከቱበት ወቅት እንደገለጹት የመስኖ ልማት ስራ የምግብ ዋስትናን ለማረጋገጥ እያገዘ ይገኛል።
በአዋሽ ፈንታሌ ወረዳ እየተካሄደ ያለው የመስኖ ልማት ስራም የዚሁ ማሳያ መሆኑን ተናግረዋል።

በወረዳው በ100 ሄክታር መሬት ላይ እየለማ ያለው ጤፍ ጥሩ ጅማሮ መሆኑን ጠቁመው በተመሳሳይ በ150 ሄክታር መሬት ላይ እየለማ ያለው በቆሎም በመልካም ተሞክሮነት የሚወሰድ መሆኑን ለአብነት ጠቅሰዋል።
ይህ የመስኖ ልማቱ ሥራ ተጠናክሮ ሊቀጥል እንደሚገባም አስገንዝበዋል።
የአዋሽ ፈንታሌ ወረዳ አስተዳዳሪ አቶ አደን በልአ በበኩላቸው እንዳሉት፤ በወረዳው ዘንድሮ በበጋ መስኖ 9 ሺህ 200 ሄክታር መሬት ላይ የተለያዩ ሰብሎች እንዲሁም አትክልትና ፍራፍሬ ለማልማት ታቅዶ ተግባራዊ እየተደረገ ነው።
እስካሁን ባለው ሂደት 4 ሺህ 500 ሄክታር መሬት መልማቱን ተናግረዋል።
የበጋ መስኖ ልማት አርብቶ አደሩን ከእንስሳት እርባታ በተጓዳኝ በግብርና ስራ በመሰማራት ተጠቃሚ እያደረገው መሆኑን አመልክተዋል።
የወረዳው አርብቶ አደሮች በመስኖ በመታገዝ ጤፍ፣ በቆሎ፣ ስንዴ፣ ሽንኩርት፣ ቲማቲም እንዲሁም ሀብሀብና ሙዝ በሰፊው አምርተው ለገበያ በማቅረብ ተጠቃሚ እየሆኑ መምጣታቸውን አስታውቀዋል።
በመስክ ምልከታው የክልሉ፣ የዞንና የወረዳ የስራ ኃላፊዎች ተገኝተዋል።












