
119ኛው የሀገር መከላከያ ሰራዊት ቀን “የድል ሰራዊት” በሚል መሪ ቃል በተለያዩ ኩነቶች እየተከበረ ይገኛል።
በበዓሉ አከባበር ላይ ተገኝተው ንግግር ያደረጉት የመከላከያ ሚኒስትር መሐመድ እድሪስ፣ ሰራዊቱ የሀገርን ሉአላዊነት ከማስከበር ባለፈ ለቀጣናዊ ሰላምና ደህንነት አስተማማኝ ዋስትና የሚሰጥ ስትራቴጂካዊ ዝግጁነት ላይ እንደሚገኝ ገልጸዋል።

በተካሄደው ጥልቅ ሪፎርም ሰራዊቱ በምድር፣ በአየር እና በሳይበር ምህዳሮች ያለው የውጊያና የደህንነት አቅም በአስተማማኝ ደረጃ ላይ ይገኛል ብለዋል።
ሰራዊቱ በዘመናዊ የጦር መሳሪያዎች፣ በሰው ሰራሽ አስተውሎት (AI)፣ በከፍተኛ ስነ-ልቦና እና በላቀ ወታደራዊ ስልጠና ራሱን ሙሉ በሙሉ ማደሱን ጠቁመዋል።
ሰራዊቱ የትኛውም የፖለቲካ ወይም የቡድን ፍላጎት ሳይሆን የህዝብና የሀገርን ህልውና ብቻ ማዕከል አድርጎ የሚንቀሳቀስ ተቋም መሆኑን አብራርተዋል።

የመከላከያ ሚኒስትሩ ለሀገር ሉአላዊነት ህይወታቸውን የገበሩ የሰራዊቱን ሰማዕታትና በየግንባሩ መስዋዕትነት እየከፈሉ የሚገኙ አባላትን ያመሰገኑ ሲሆን፤ መላው የኢትዮጵያ ህዝብ ከሰራዊቱ ጎን እንዲቆም ጥሪ አቅርበዋል።
በስነ-ስርዓቱ ላይ የጦር ኃይሎች ጠቅላይ አዛዥ ፊልድ ማርሻል ብርሃኑ ጁላ፣ ከፍተኛ የጦር መኮንኖች፣ ሚኒስትሮች እና ጥሪ የተደረገላቸው የክብር እንግዶች ተገኝተዋል።
በ-ናሆም ዮሐንስ












