December 24, 2025
የሊቢያ ጦር ጠቅላይ አዛዥ በቱርክ በደረሰ የአውሮፕላን አደጋ ሕይወታቸው አለፈ። የሊቢያ ጦር ጠቅላይ አዛዥ ጄነራል መሐመድ አሊ አህመድ አል-ሐዳድ በቱርክ በደረሰ የአውሮፕላን አደጋ ሕይወታቸው ማለፉን የሊቢያ ጠቅላይ ሚኒስትር አስታውቀዋል። በአደጋው አብረዋቸው የነበሩ አራት ከፍተኛ ወታደራዊ መኮንኖች ጭምር ሕይወታቸው ማለፉ ነው ጠቅላይ ሚኒስትሩ የገለፁት።

የጦር መኮንኖቹ ፋልኮን 50 በተሰኘ የግል ጄት ከቱርክ መዲና አንካራ ተነስተው ወደ ትሪፖሊ በመጓዝ ላይ ሳሉ ነው አደጋው የደረሰው። በአሁኑ ወቅት የአደጋው መንስኤ ለማወቅ ሰፊ ምርመራ እየተካሄደ እንደሚገኝም ተጠቁሟል ። የቱርክ የሀገር ውስጥ ጉዳይ ሚኒስትር አሊ ይርሊካያ በኤክስ (X) ገጻቸው እንደገለጹት፣ የአውሮፕላኑ ስብርባሪ በአንካራ አቅራቢያ በሃይማና ዲስትሪክት፣ ኬሲካቫክ በተባለች መንደር አቅራቢያ በፖሊስ መገኘቱን ገልጸዋል ።

በዓለም አቀፍ ደረጃ እውቅና ያለው የሊቢያ ብሔራዊ አንድነት መንግሥት ጠቅላይ ሚኒስትር አብዱል ሃሚድ ድቤባህ፣ በጄነራል አል-ሐዳድን እና በሌሎች ከፍተኛ መኮንኖች ሞት የተሰማቸውን ጥልቅ ሐዘን የገለፁ ሲሆን “ይህ ለሀገራችን ታላቅ ኪሳራ ነው፤ ሊቢያ ሀገራቸውን በታማኝነት እና በትጋት ያገለገሉ ጀግኖቿን አጥታለች” ብለዋል።

ጄነራል አል-ሐዳድ እና ቡድናቸው ወደ ቱርክ ያቀኑት በሁለቱ ሀገራት መካከል ያለውን ወታደራዊ እና የደህንነት ትብብር ይበልጥ ለማጠናከር ያለመ ውይይት ለማድረግ እንደነበረም ተመላክቷል ።
ዘገባው የቢቢሲ ነው
በ-ሰላማዊት ወልደገሪማ












