የኢትዮጵያ ግዙፍ የልማት ዕቅድ ፕሮጀክቶች ለኢንዱስትሪ ዕድገት መፋጠን ጉልህ ሚና እንደሚኖራቸው የኢንዱስትሪ ሚኒስትር መላኩ አለበል አስታወቁ።
የኢንዱስትሪ ሚኒስትር አቶ መላኩ አለበል እንዳሉት፤ በጥቂት ዓመታት ውስጥ ለኢንዱስትሪ ምርታማነት የተደረገው ድጋፍ ዘርፉ ተጨባጭ ዕድገት እንዲያስመዘግብ መሰረት ጥሏል ብለዋል።
በጠቅላይ ሚኒስትር ዐቢይ አሕመድ (ዶ/ር) አነሳሽነት ተመርቀው ለአገልግሎት የበቁና የመሠረት ድንጋይ የተቀመጠላቸው ግዙፍ ሀገራዊ ፕሮጀክቶችም ለኢንዱስትሪ ዘርፍ ትርጉም እንደሚሰጣቸው ገልጸዋል።
በተለይም የአፈር ማዳበሪያ ፋብሪካ እና የተፈጥሮ ጋዝ የማዕድን ልማት ፋብሪካ ፕሮጀክቶች የግብርና ምርታማነትን በማሳደግ ተጨማሪ የኢንዱስትሪ ግብዓት በመሆን ለኢኮኖሚ ማንሰራራት መሠረት የሚጥሉ መሆናቸውን አስረድተዋል።
የዩሪያ ማዳበሪያ ማምረቻ ፋብሪካ ፕሮጀክቱም የአርሶ አደሮችን የግብዓት አቅርቦት ፍላጎት በማሟላት የግብርና ምርታማነትን ለማስቀጠል ጭምር የማይተካ ሚና እንደሚኖረው አስገንዝበዋል።
የተፈጥሮ ጋዝ ፋብሪካ ፕሮጀክቱም አምራች ኢንዱስትሪው አማራጭ የኃይል አቅርቦት እንዲያገኝ በማስቻል የምርት ተወዳዳሪነትን በማሳደግ ለኢንቨስትመንት ፍሰት ጉልህ ፋይዳ እንደሚኖረው አስረድተዋል።
የኢትጵያን ሀገራዊ ሁለንተናዊ የኢኮኖሚ ዕድገት ለማስቀጠልም በአምራች ኢንዱስትሪ ዘርፍ የተመዘገቡ ስኬቶችን ለማስቀጠል በትኩረት እየተሰራ እንደሚገኝ ተናግረዋል ሲል የዘገበው ኢዜአ ነው።












