ጠቅላይ ሚኒስትሩ የታላቁ የኢትዮጵያ የህዳሴ ግድብ ምረቃ ስነ ስርዓት ላይ ባስተላለፉት መልዕክት ግድቡ ራሱ ማውራት የሚችልበት ደረጃ ላይ ደርሷል ብለዋል።
ግድቡን በፎቶም ሆነ በንግግር መግለጽ እንደማይቻል የተናገሩት ጠቅላይ ሚኒስትር ዶ/ር አብይ አህመድ ለሁሉም የጥቁር ዜጎች በስፍራው ተገኝተው ግድቡን እንዲመለከቱት ጥሪ አቅርበዋል፡፡ ግድቡ 74 ትሪሊየን ሊትር ውሃ መያዙን በመግለጽ ህዳሴ የኢትዮጵያ የልመና፣ የስንፍና እንዲሁም የእንጉርጉሮ ዘመን ማብቂያ ነው ሲሉ ገልጸውታል፡፡
ጠቅላይ ሚኒስትሩ በታላቁ የኢትዮጵያ ህዳሴ ግድብ ምረቃ ስነ ስርዓት ላይ ባደረጉት ንግግር ለታችኛው የተፋሰስ ሀገራት ባስተላለፉት መልዕክት ኢትዮጵያ ጎረቤቶቿን የመጉዳት ምንም ፍላጎት የላትም ያሉ ሲሆን እኛ ተጠቅመን ሌላውን የመጉዳት ፍላጎት የለንም ሲሉ ተናግረዋል።
ስለ ህዳሴ በማዜም ብቻ ጊዜ ማጥፋት የለብንም ያሉት ጠቅላይ ሚኒስትር ዶ/ር ዐብይ አህመድ ሀገሪቱ በቀጣይ ጊዜያት ልታሳካ የያዘቻቸውን ግዙፍ እቅዶችን ዘርዝረዋል።
በዚህም የኑክሌር ፕላንት፣ የጋዝ እና የማዳበሪያ ፋብሪካዎችን ጨምሮ ከ1 ነጥብ 5 ሚሊየን በላይ መኖሪያ ቤቶችን በሚቀጥሉት 5 እና 6 አመታት ውስጥ ለመገንባት እቅድ መያዙን አብራርተዋል፡፡
በግድቡ ምረቃ መርሃ ግብር ላይ እስካሁን በነበረው የግንባታው ሂደት የላቀ አበርክቶ ለነበራቸው አራት አመራሮች የክብር ኒሻን ሜዳሊያ ተበርክቶላቸዋል።












