ሁለተኛው የአፍሪካ የአየር ንብረት ለውጥ ጉባኤ መካሄድ ጀመሯል።
ጉባኤውን የከፈቱት የኢፌዴሪ ጠቅላይ ሚኒስትር ዐቢይ አህመድ (ዶ/ር) ዛሬ የተገናኘነው በአየር ንብረት ለውጡ ዙሪያ ለመምከር ብቻ ሳይሆን የአለምን ቀጣይ የአየር ንብርት ፋይናንሲንግን ለመወሰን ነው ብለዋል። ይህ የህልውና ጉዳይ ነው በህልውናችን ደግሞ አንደራደርም ነው ያሉት።
ጠቅላይ ሚኒስትር ዐቢይ አሕመድ(ዶ/ር) የአፍሪካን የአየር ንብረት የመቋቋም እና ዘላቂ ብልጽግናን ለማረጋገጥ ቁርጠኝነቷን የሚያጎላ ታሪካዊ ስብሰባ ነው ሲሉ ገልፀውታል።
የኢትዮጵያ መንግሥት እና የአፍሪካ ኅብረት ኮሚሽን በጋራ ያስተናገዱት የሦስት ቀናት ጉባኤ በአለም አቀፍ የአየር ንብረት ርምጃ የአፍሪካን ድምጽ አንድ ለማድረግ እና በአፍሪካ የሚመሩ መፍትሄዎችን ለማበረታታት ያለመ እንደሆነም ተናግረዋል።
ጠቅላይ ሚኒስትር ዐቢይ አሕመድ አፍሪካ እንደ አህጉሪቱ ላጋጠሟት ልዩ ተግዳሮቶች ተስማሚ የሆኑ የአየር ንብረት መፍትሄዎችን በማራመድ ረገድ ያላትን አመራር አፅንዖት ሰጥተዋል።
ኢትዮጰጵያም የአየር ንብረት ተፅእኖውን ለማከላከል ከ7 ዓመት በፊት በጀመረችው የአረንጓዴ አሻራ መረሀ ግብር ከ48 ቢሊየን በላይ ችግኝ መተከሉን አንስተው እንደ የኮሊደር ልማት፣ የወንዝ ዳር ልማት፣የሌማት ቱሩፋትን እንዲሁም በቅርቡ የሚመረቀው የኢትዮጵያ ህዳሴ ግድብን ጨምሮ ራስን በምግብ ለመቻል ብሎም የአየር ንብረት ለውጡን ለመቋቋም በራስ አቅም በርካታ ስራዎችን እየሰራች እንደምትገኝ ገልፀዋል።
ሁለተኛው የአፍሪካ የአየር ንብረት ጉባኤ በአፍሪካ የሚመሩ የአየር ንብረት መፍትሄዎችን እና አህጉሪቱ የመሬት ገጽታን እንደገና የማልማት ጥረቶችን የሚያሳይ ሲሆን ይህም የአየር ንብረት ለውጥ ተፅእኖዎችን ለመቅረፍ እና አረንጓዴ ልማትን ለማጎልበት መሰረት ይጥላል ብለዋል።
የጉባኤው ጭብጥ ዓለም አቀፍ የአየር ንብረት መፍትሄዎችን ማፋጠን እና ለአፍሪካ የአየር ንብረት ተቋቋሚ እና አረንጓዴ ልማት የገንዘብ ድጋፍ ክፍተትን በማስተካከል፣ በተፈጥሮ ላይ የተመሰረቱ እና የቴክኖሎጂ መፍትሄዎችን በማበረታታት እና የአህጉሪቱን ቅድሚያ የሚሰጣቸውን ጉዳዮች ከ ኮፕ 30 በፊት በማስተካከል ላይ ያተኮረ እንደሆነም አስረድተዋል።
ዉይይቶቹ የአየር ንብረት ፍትህን ለማጠናከር፣ አረንጓዴ ኢኮኖሚዎችን ለማሳደግ እና በታዳሽ የኃይል ምንጮች እና የደን መልሶ ማልማት ላይ ኢንቨስትመንትን ለማሳደግ ያለንን ውጥን ያሳካል ነው ያሉት።
ጠቅላይ ሚኒስትር ዐቢይ አህመድ አፍሪካ እና ካሪቢያን ዓለም አቀፋዊ ተግዳሮቶችን ለመፍታት በአንድ ድምፅ መናገር እንደሚያስፈልጋቸው አፅንዖት ሰጥተዋል። አፍሪካ የአየር ንብረት ችግሩን አላመጣችም የመፍትሄ አካል ለመሆን ግን እየሰራች ነው ብለዋል።መፍትሄውም ደግሞ እኛ ጋር አለ ያሉ ሲሆን ኢትዮጵያ
በ2027 የሚካሄደውን ኮፕ 32ን ለማዘጋጀት አቅም እንዳላትም ገልፀዋል። ሁለተኛው የአፍሪካ የአየር ንብረት ጉባኤ አፍሪካ በአየር ንብረት ለውጡ ተጠቂ ከመሆን ይልቅ በአየር ንብረት መፍትሄዎች መሪ እና ፈጣሪ እንድትሆን ወሳኝ ሚና ይጫወታል ተብሎ ይጠበቃል።
በ-ሄርሜላ ፍቃደ












