በሰሜን ሸዋ ዞን ሲንቀሳቀሱ የነበሩ ታጣቂዎች የመንግስትን የሰላም ጥሪ ተቀብለው ትጥቃቸውን አስረክበዋል።
በአማራ ክልል ሰሜን ሸዋ ዞን ደብረ ብርሀን ከተማ፤ የቀድሞ ታጣቂዎች የተሀድሶ ስልጠና የመክፈቻ መርሀግብር እየተካሄደ ይገኛል።

በመርሀግብሩ ንግግር ያደረጉት የብሔራዊ ተሀድሶ ኮሚሽን ዋና ኮሚሽነር ተመስገን ጥላሁን፤ በአማራ ክልል ደብረ ብርሃን፣ ኮምቦልቻ እና ጎንደር በሁለተኛው ዙር ከ6ሺ በላይ የቀድሞ ታጣቂዎችን ወደ ሰላም ማምጣት መቻሉን ገልጸዋል።
በመጀመርያው ዙር በተከናወኑ ስራዎች በትግራይ ክልል ከ60ሺ በላይ፣ በአፋር ክልል 1ሺ 7መቶ፣ በአማራ ክልል ከከ 5ሺ በላይ፣ በኦሮሚያ ክልል 5ሺ 2መቶ በአጠቃላይ ከ72ሺ 500 በላይ ታጣቂዎች በተሃድሶ ማዕከል አልፈው ወደ ህብረተሰቡ እንዲቀላቀሉ ተደርጓል ብለዋል።
አሁንም ነፍጥ አንግበው የሚንቀሳቀሱ አካላት ሰላምን ሽተው የሚመጡ ከሆነ ከመቼውም ጊዜ በላይ ኮሚሽኑ ዝግጁ መሆኑን ገልጸው፤ በየትኛውም የሀገሪቱ አካባቢዎች እየተንቀሳቀሱ ያሉ ታጣቂዎች ወደ ሰላም እንዲመጡ ጥሪ አቅርበዋል።

በመርሀግብሩ ላይ የመንግስት ኮሚኒኬሽን ሚኒስቴር ዴኤታ ተስፋዬ ጎበዛይ፣ የአማራ ክልል ጸጥታ ቢሮ ሀላፊ እሸቱ የሱፍ(ዶ/ር)፣ የብሔራዊ ተሀድሶ ኮሚሽን ዋና ኮሚሽነር ተመስገን ጥላሁን፣ ደብረ ብርሀን ከተማ ከንቲባ ተወካይ ዳንኤል እሸቱ እንዲሁም ሌሎች ከፍተኛ አመራሮች እና በርካታ ትጥቅ የፈቱ የቀድሞ ታጣቂዎች ተገኝተዋል።
በ-ሰላማዊት ወንድወሰን












