የኢትዮ ኢንጂነሪንግ ግሩፕ የክረምት በጎ ፈቃድ አገልግሎት የማስጀመሪያ መርሃ ግብር ዛሬ በጋምቤላ ከተማ ተካሂዷል።
የጋምቤላ ክልል ርዕሰ መስተዳድር ዓለሚቱ ኡሞድ እንደገለጹት የመደጋገፍና የመተባበር እሴቶችን በማጎልበት ለሀገራዊና ክልላዊ የልማትና የብልጽግና ጉዞ ስኬታማነት ተግተን ልንሰራ ይገባል። አክለውም እንደ ክልል ብሎም እንደ ሀገር የታቀደውን የልማትና የብልጽግና ጉዞ ማሳካት የሚቻለው የትብብርና የመደጋፍ እሴቶችን አጎልብቶ መስራት ሲቻል ነው ብለዋል።
የክረምት ወራት የበጎ ፈቃድ አገልግሎት የአረንጓዴ አሻራ ልማት ሥራዎችን ለማጠናከር፣ አቅመ ደካማ ወገኖችን ለማገዝና መሰል የልማት ሥራዎችን ለማከናወን ጠቀሜታው የጎላ መሆኑንም ተናግረዋል።
በመሆኑም በክረምት የበጎ ፈቃድ አገልግሎት ለማከናወን የተያዙትን የልማት ዕቅዶች ከስኬት ለማድረስ ሁሉም ባለድርሻ አካላት ማህበራዊ ኃላፊነቱን ሊወጣ እንደሚገባ ርዕሰ መስተዳድሯ አሳስበዋል።
የኢትዮ ኢንጂነሪን ግሩፕ ዋና ሥራ አስፈፃሚ ኮሎኔል ሸጋው ሙሉጌታ በዚሁ ጊዜ እንዳሉት መስሪያ ቤቱ ከመደበኛ የሥራ ተልዕኮ በተጨማሪ እንደ ሀገር በማህበራዊና ኢኮኖሚያዊ ዘርፎች እየተከናወኑ ባሉ የልማት ሥራዎች በመሳተፍ የድርሻውን እየተወጣ ይገኛል።
በተያዘው ክረምትም በጋምቤላ ክልል ተመሳሳይ ሥራዎችን ለማከናወን መምጣቸውን ጠቁመው፤ በዚህም ድርጅቱ የአረንጓዴ አሻራ ችግኝ ተከላ፣ የአቅመ ደካማ ቤቶች እድሳትና ሌሎች የልማት ሥራዎችን ያከናውናል ብለዋል።
የኢትዮ ኢንጂነሪግ ግሩፕ አመራሮች ከክልሉ ርዕሰ መስተዳድር ዓለሚቱ ኡሞድና ሌሎች ከፍተኛ የሥራ ኃላፊዎች ጋር በመሆን ችግኝ በመትከል አረንጓዴ አሻራቸውን አሳርፈዋል። ከእዚህ በተጨማሪ ለ100 ተማሪዎች የትምህርት ቁሳቁስ ድጋፍ የተደረገ ሲሆን የሦስት አቅመ ደካማ ቤቶችን እድሳት ስራንም አስጀመረዋል ሲል የዘገበው ኢዜአ ነው፡፡












