በ2017 የአረንጓዴ ዐሻራ መርሐ ግብር የሀገር መከላከያ ሰራዊት ከ18 ሚሊየን በላይ ሀገር በቀል እና ለምግብነት የሚውሉ ችግኞች እንደሚተክል አስታውቀ።
የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ በመረሀ ግብሩ ላይ እንደተናገሩት፤ ሰራዊቱ ባለፉት ዓመታት በተከናወኑ የአረንጓዴ ዐሻራ መርሐ ግብሮች ከፍተኛ ተሳትፎ አድርጓል። እንደሀገር ከተጀመረበት ጊዜ ጀምሮ የደን ሽፋንን በማሳደግ፣ የምግብ ዋስትናን በማረጋገጥና የአየር ንብረት ለውጥን በመከላከል ውጤት እያመጣ ነው ብለዋል።
የዘንድሮ የአረንጓዴ ዐሻራ መርሀ ግብር ከዛሬ ጀምሮ ሰራዊቱ በያለበት የግዳጅ ቀጣና እና በመኖሪያ ካምፖች ጭምር ችግኝ በመትከል አረንጓዴ ዐሻራን ባህል የማድረግ ተግባሩን አጠናክሮ እንደሚቀጥል አረጋግጠዋል።
የመከላከያ ሚኒስትር ዴኤታ ቶማስ ቱት በበኩላቸው፤ የሀገር መከላከያ ሰራዊት ከተሰጠው ግዳጅ ጎን ለጎን በአካባቢ ጥበቃ ላይ በንቃት እየተሳተፈ ይገኛል ብለዋል። የመከላከያ ሰራዊቱም የበኩሉን ሚና በመወጣት ዐሻራውን እያኖረ እንደሚገኝ ተናግረዋል።
በመርሐ ግብሩ ላይ የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ፣ የመከላከያ ሚኒስትር ዴኤታዎች፣ ጄነራል መኮንኖችና የተለያዩ ሀገራት ወታደራዊ አታሼዎች ተገኝተዋል ሲል የዘገበው ኢዜአ ነው።












