የአረንጓዴ ዐሻራ መርሐ ግብር የሥርዓተ-ምህዳር ጥበቃን በማጠናከር የኢትዮጵያ ብዝሃ ህይወት ሀብት እንዲያንሰራራ እያደረገ መሆኑን የኢፌዴሪ ፕሬዚዳንት ታዬ አፅቀሥላሴ ገለጹ፡፡ ፕሬዚዳንት ታዬ አፅቀሥላሴ እና የፕሬዚዳንት ጽህፈት ቤት ሠራተኞች በየካ ተራራ አረንጓዴ ዐሻራቸውን አኑረዋል፡፡
የአረንጓዴ ዐሻራ መርሐ ግብር በርካታ ትሩፋቶችን እያስገኘ እንደሚገኝ ያነሱት ፕሬዚዳንት ታዬ፣ የአየር ንብረት ለውጥን ከመከላከል አንጻር ከፍተኛ አስተዋጽኦ እያበረከተ ነው ብለዋል። ኢትዮጵያ በዓለም አቀፍ ደረጃ ከፍተኛ ዕውቅና እንድታገኝ ያስቻለ መሆኑንም ጠቁመዋል፡፡
የአረንጓዴ ዐሻራ መርሐ ግብር በርካታ ጠቀሜታዎችን በማስገኘት ላይ ነው ያሉት ፕሬዚዳንቱ፥ የተራቆተ የአካባቢ ስርዓተ ምህዳር እንዲታደስ እና እንዲለመልም እያደረገ ነው ብለዋል።
የመሬት መንሸራተትን በመከላከልና የውሃ ሃብትን በመጠበቅ በኩልም ወሳኝ ሚና እየተጫወተ መሆኑን የተናገሩት ርዕሰ ብሄሩ፣ በምግብ ራስን ለመቻል የሚደረገውን ጥረት እያገዘ መሆኑን ጠቁመው በአፍሪካ በርሃማነትን ለመከላከል አርዓያነት ያለው ተነሳሽነት እንደሆነም አፅንኦት ሰጥተዋል።
አረንጓዴ ዐሻራ ተመናምኖ የነበረው የኢትዮጵያ ብዝሃ ህይወት ሀብት እንዲያንሰራራ እያደረገ መሆኑን ጠቅሰው፥ ከሰው ልጅ ህይወት ጋር የተሳሰረ ነው ብለዋል።
በአረንጓዴ ዐሻራ መርሃ ግብር መሳተፍ ለመጪው ትውልድ የተሻለች ሀገር የማስረከብ ሀገራዊ አጀንዳ በመሆኑ፥ ሁሉም ህብረተሰብ ችግኝ በመትከል እንዲሳተፍ ጥሪ አቅርበዋል።
ጠቅላይ ሚኒስትር ዐቢይ አሕመድ(ዶ/ር) ለመርሐ ግብሩ ስኬታማነት ከሐሳብ ማመንጨት እስከ ትግበራ እያደረጉ ላሉት የመሪነት ሚናም ምስጋና አቅርበዋል፡፡












