በኢትዮጵያም ግብርና ለዓመታዊ ጥቅል ሀገራዊ ምርት 32 በመቶ ለስራ እድል ፈጠራ ደግሞ 60 በመቶ አስተዋጽኦ እያበረከተ መሆኑን የግብርና ሚኒስትር ግርማ አመንቴ (ዶ/ር) ገለጹ።
በ3ኛው የአፍሪካ የሥራ ዕድል ፈጠራ ፎረም ላይ ትኩረቱን የግብርና እሴት ሰንሰለት ላይ ያደረገ የፓናል ውይይት እየተካሄደ ይገኛል።
በፓናሉ መክፈቻ ላይ ንግግር ያደረጉት የግብርና ሚኒስትር ግርማ አመንቴ (ዶ/ር) ፤ ለስራ ዕድል ፈጠራ ወሳኝ በሆኑት ሁሉን አቀፍ የግብርና ልማት ፕሮግራም እና የአፍሪካ ነጻ የንግድ ቀጣና ላይ ትኩረት አድርገን ልንሰራ ይገባል ብለዋል፡፡
ግብርና የኢኮኖሚ እና የስራ እድል ፈጠራ ምተር መሆኑን ገልጸው፤ በአፍሪካ ከ60 በመቶ በላይ የሚሆኑት ዜጎች ግብርና ላይ የተመሠረቱ መሆናቸውን ተናግረዋል። ባለፉት ዓመታት በስንዴ ልማት፣ በአረንጓዴ አሻራ እና በሌማት ትሩፋት መርሐግብር በተሰራው ስራ በግብርናው ዘርፍ ተጨባጭ ውጤት መመዝገቡን ተናግረዋል።
የአፍሪካ ስራ ፈጠራ ፎረም በአፍሪካ በሚቀጥሉት 15 ዓመታት ከ80 እስከ 125 ሚሊዮን ለሚሆኑ ዜጎች የሥራ እድል ለመፍጠር የያዘውን ዕቅድ ለማሳካት ግብርና ወሳኝ ዘርፍ መሆኑን አስታውቀዋል።
ዘርፉን ለማሳደግ ግብርናን ማዘመን፣ የግብርና እሴት ሰንሰለትንና የገበያ ትስስርን ማስፋፋት እንዲሁም በዘርፉ ያሉትን የፖሊሲ እና ሌሎች ችግሮችን ለመፍታት በትብብር መሥራት እንደሚገባ ገልጸዋል ሲል የዘገበው ኢ ፕ ድ ነው፡፡












