።።።።።።።።።።።።።።።።።።።።።።።።።።
ዓለም አቀፍ የጤና ኢኖቬሽን እና ጥራት ጉባኤ “ኢኖቬሽን ለሁለንተናዊ የጤና ሽፋን” በሚል መሪ ሀሳብ እየተካሄደ ይገኛል። ጉባኤው በዓለም አቀፍ ደረጃ ጥራት ያለው የጤና አገልግሎት ተደራሽ ለማድረግ የልምድ ልውውጥ የሚደረግበት እና ዘላቂ መፍትሄዎችን ለማመላከት የሚያግዝ ነው ተብሏል።
የመክፈቻ ንግግር ያደረጉት የጤና ሚኒስትር ዴኤታ ሰሃረላ አብዱላሂ ኢትዮጵያ በጤናው ዘርፍ የተሻለ ስራዎችን እየሰራች መሆኑ ጠቁመዋል። በዘለምድ የሚሰሩ ስራዎችን በፈጠራ በመደገፍ ተላላፊ ያልሆኑ በሽታዎችንና ወረርሽኝ ስርጭት ለመከላከል፣የእናቶችና ህጻናት ሞትን ለመቀንስ ብሎም በዘርፉ ላይ ያሉ ችግሮችን መፍትሄ እንዲያገኙ የመፍትሄ ሀሳቦች የሚቀርቡበት መድረክ መሆኑን ተናግረዋል።
ጉባኤው ዓለም አቀፍ ተሞክሮን የሚጋራበት ብሎመ ኢትዮጵያ በጤና ስርዓቱ ላይ ያከናወናቸውን ስራዎች የምታሳይበት ነው ብለዋል። ለአብነት እንደ አገር ከተከናወኑ ስራዎች ባለፉት ሁለት ዓመታት በተሰሩ ስራዎች የጨቅላ ህጻናት እና የእናቶችን ሞት መቀነስ መቻሉን ተናግረዋል።
ባለፈው 10 ዓመት ወባን በመከላከል በተሰራ ስራ 60 በመቶ ሞትን መቀነስ ተችሏል ሲሉ ነው የገለጹት። የኢኖቬሽንና ቴክኖሎጂ ሚኒስትር ዴኤታ ባይሳ በዳዳ(ዶ/ር) ለሁሉም ማህበረሰብ የማይበገር የጤና ስርዓትን ለመገንባት ኢኖቬሽን ቅንጦት ሳይሆን እስካሁን የገጠሙ ችግሮች ለመቅረፍ ያግዛል ነው ያሉት።
ኢኖቬሽን ከጤናው ዘርፍ በማጣመር በርካታ ለውጦች ማምጣት እንደሚቻል በመጠቆም በቀጣይ ይበልጥ ትኩረት እንደሚደረግ ነው የጠቆሙት። በኢትዮጵያ የዓለም ጤና ድርጅት ተወካይ ዶክተር ኦወን ካሉዋ ባለፉት ጥቂት ዓመታት የኢፌድሪ ጤና ሚኒስቴር ጥራቱን የጠበቀ የጤና ዘርፍ ተደራሽ ለማድረግ ስራዎች መስራቱን በመጠቆም ዘርፉን ከኢኖቬሽን ለማስተሳሰር በትብብር መስራት እንደሚጠይቅ ተናግረዋል።
መድሩኩ በዘርፉ የሚታዩ ችግሮችን በመለየት ዘላቂ መፍትሄዎችን ለማመላከ ያለመ ነው ። በጉባኤው ከፍተኛ የስራ ኃላፊዎች፣ በጤናው ላይ የካበት እውቀት ያላቸው አገር አቀፍ እና ዓለም አቀፍ የጤና ባለሙያዎች የተገኙበት ነው። ጉባኤው ዛሬን ጨምሮ ለተከታታይ 3ቀናት የሚካሄድ ነው።
በ-ሰላም ይልማ












