::::::::::::::::::::::::::::::::::::
በኢትዮጵያ 90 በመቶ ያህሉ ማህበረሰብ ምግቡን ለማብሰል በባህላዊ መንገድ ወይም በእንጨት እንደሚያበስል የውሃና ኢነርጂ ሚኒስቴር አስታውቋል ።በአሁኑ ሰአት ዘመናዊ ማብሰያን የሚጠቀሙ ኢትዮጵያውያን 10 በመቶ ብቻ መሆናቸው ተገልጿል ።
በኢትዮጵያ ያለውን የንጹህ ማብሰያ እጥረት ለመቅረፍ ያግዛል የተባለው ሀገር አቀፍ የንጹህ ማብሰያ ፍኖተ ካርታ የማስጀመሪያ መርሃ ግብር በመካሄድ ላይ ይገኛል።
ከ100 ሚሊዮን በላይ ኢትዮጵያውያን በዋነኛነት ሴቶች እና ህጻናት አሁንም በባህላዊ ባዮማስ ነዳጆች በሆኑት ማገዶ፣ ከሰል እና ኩበት ላይ ጥገኛ መሆናቸው ነው የተገለጸው ።
ከእነዚህ ማብሰያዎች የሚወጣው ጭስም በጤና ላይ ቀውስ በማስከተል በየአመቱ ከ 63 ሺ በላይ ለሚሆኑ ሰዎች ሞት ምክንያት መሆኑን መረጃዎች ያመላክታሉ ።
በኢትዮጵያ የቤት ውስጥ ብክለት ምክንያት የሚደርሰው አጠቃላይ የኢኮኖሚ ኪሳራ 29.9 ቢሊዮን ዶላር በአመት ይገመታል።
በመርሃ ግብሩ ያልዘመነ የማብሰያ ዘዴ ለደን መጨፍጨፍ የሚያጋልጥ ከመሆኑ ጋር ተያይዞ ለአየር ንብረት ለውጥ ፣ ለውሀና አፈር መሸርሸር ምክንያት በመሆን ግብርና ምርታማነት እንዲቀንስ ያደርጓል።
የንጹህ የማብሰያ ቴክኖሎጂ፣ ፓሊሲና ስትራቴጂ ብሎም ህጎችን በማውጣት፤ የህብረተሰቡን ባህል እና የአኗኗር ዘይቤ ያማከለ የንጹህ ማብሰያ ቴክኖሎጂ አጠቃቀም በማስተዋወቅ ተደራሽነት ላይ ለመሥራት ፍኖተ ካርታው ያግዛል ተብሏል ።
ንጹህ ምግብ ማብሰል የኃይል ጉዳይ ብቻ ሳይሆን የእድገት ቅድሚያ የሚሰጠው ጉዳይ ነው. በጤና፣ በጾታ እኩልነት፣ በትምህርት፣ በአየር ንብረት ለውጥ፣ በደን እና ኑሮ መሻሻል ላይ ከፍተኛ ተጽእኖ እንዳለው ተጠቁሟል ።
ሀገራዊውን የንጹህ ማብሰያ ፍኖተ ካርታ ተግባራዊ ለማድረግ ከመንግሰት ባሻገር የግሉ ዘርፍ ሊያግዝ እንደሚገባም ተገልጿል ።
በ – ሰላማዊት ወልደገሪማ












