፡፡፡፡፡፡፡፡፡፡፡፡፡፡፡፡፡፡፡፡፡፡፡፡፡፡፡፡
በአውሮፓ ቻምፒዮንስ ሊግ የግማሽ ፍጻሜ የመልስ ጨዋታ በፓርክ ደ ፕሪንስ ፒኤስዤ ከአርሰናል ምሽት 4 ሰዓት ይጨወታሉ።
በኤምሬትስ በተደረገው የመጀመሪያው ዙር ጨዋታ የፓሪሱ ቡድን 1-0 በሆነ ጠባብ ውጤት ማሸነፉ የምሽቱን ፍልሚያ ተጠባቂ አድርጎታል።
ከጨዋታው አስቀድሞ በተሰጠ ጋዜጣዊ መግለጫ የመድፈኞቹ አሰልጣኝ “ታሪክ ለመስራት ተዘጋጅተናል፣እዚህ ድረስ የመጣነውም ለዚሁ ነው’’ ሲሉ ተናግረዋል።
አያይዘውም “ፒኤስዤን ማሸነፍ የምንችለው ከእነሱ የተሻልን ሆነን በመገኘት ነው፣ ምን ማድረግ እንደምንችል እናውቃለን፣ ከመጀመሪያው ዙር ጨዋታ ብዙ ተምረናል” ብለዋል።
አሰልጣኝ አርቴታ ቀኝ መስመር ተካላካዩ ዩሪየን ቲምበር በጨዋታው መሰለፍ መቻሉን ገምግመን እንወስናለን ያሉ ሲሆን፤ ሪካርዶ ካላፊዮሪ ለጨዋታው በሙሉ አካላዊ ዝግጁነት ላይ እንደሚገኝ አክለዋል።
በባለሜዳው ፒኤስዤ በኩል ወሳኙ ታጫዋቻቸው ኦስማን ዴምቤሌ ከጉዳቱ አገግሞ ለምሽቱ ፍልሚያ ዝግጁ መሆኑን አሰልጣኝ ልዊስ ኤንሪኬ ተናግረዋል።
ፈረንሳዊው የመስመር አጥቂ በኤምሬትስ በተከናወነው የመጀመሪያ ዙር ጨዋታ የፒኤስዤን ብቸኛ ግብ ከመረብ ማሳረፉ አይዘነጋም።
በ- አልፈሪድ ነስሮ












