::::::::::::::::::::::::::::::::
8፡30 ሲል በጉዲሰን ፓርክ ኤቨርተን አርሰናልን የሚያስተናግድበትብ ጨዋታ ተጠባቂ ሆኗል። ቡካዮ ሳካ ከረጅም ጊዜ ጉዳት በኋላ ተመልሶ በፉልሃሙ ጨዋታ ግብ ማስቆጠሩ ለቡድኑ መነቃቃትን ቢፈጥርም፣ ተከላካዩ ማግሃሌሽ እስከ ውድድር አመቱ መጨረሻ ወደ ሜዳ አለመመለሱ መጥፎ ዜና ሆኗል።
ኤቨርተን ከትላንት በስቲያ በሊቨርፑል እስኪሸነፍ ድረስ በሊጉ ሳይረታ መቆየት ችሏል፣ የአሰልጣኝ ዴቪድ ሞይስ መመለስ ለቶፊዎቹ በውጤት እንዲሻሻሉ ምክንያት ሆኗል። በተለይ በሜዳቸው በሚያደርጓቸው ጨዋታዎች ለተጋጣሚ ቡድን አስቸጋሪ እንደሚሆኑ ማሳየት ችለዋል።
የሚኬል አርቴታ ቡድን ከመሪው ሊቨርፑል ያለውን የ12 ነጥብ ልዩነት ለማጥበብ አዳጋች በመሆኑ እንደብዙዎች ግምት ትኩረቱን በቀጣይ ሳምንት በሚኖረው የቻምፒዮንስ ሊግ ጨዋታ ላይ አድርጓል።
መድፈኞቹ በተጋጣሚያቸው የውጤት የበላይነት ቢኖራቸውም፣ ያለፉትን አመታት በጉዲሰን ፓርክ ሲፈተኑ ተስተውሏል።
ኢፕስዊች ከ ዎልቭስ፣ ዌስትሃም ከ ቦርንማውዝ፣ ክሪስታል ፓላስ ከ ብራይተን በተመሳሳይ 11 ሰዓት ላይ የሚደረጉ መርሃ ግብሮች ናቸው።
ምሽት 1፡30 ሲል በቪላ ፓርክ አስቶን ቪላ ኖቲንግሃም ፎረስትን የሚያስተናግድበት ጨዋታም እንዲሁ ተጠባቂ ነው።
የቻምፒዮንስ ሊግ ስፍራን ይዞ ለማጠናቀቅ የተቃረቡት ፎረስቶች፣በሌላኛው የአውሮፓ ውድድሮች የሊግ ስፍራን ለመያዝ በሚፎካከረው ቪላ ይፈተናሉ ተብሎ ይጠበቃል።
የኡናይ ኢምሬ አስቶን ቪላ ወደ ሜዳ የሚገባው በቀጣይ ሳምንት ከ ፒኤስጅ ያለበትን የቻምፒዮንስ ሊግ ወሳኝ ግጥሚያ ከግምት በማስገባት ቁልፍ ተጫዋቾቻቸውን በማሳረፍ ሊሆን እንደሚችል ተገምቷል።
በ- አልፈሪድ ነስሮ












