፨ ፨ ፨ ፨ ፨ ፨ ፨ ፨ ፨
አዲስ አበባ | ታህሳስ 17 2017| NBC ETHIOPIA -ባለፉት የለውጥ ዓመታት የኢትዮጵያን የብልፅግና ጉዞ ሊደግፍ የሚችል ገቢ የመሰብሰብ አቅም መፈጠሩን የብልፅግና ፓርቲ ስራ አስፈጻሚ ኮሚቴ አባልና የገቢዎች ሚኒስትር ዓይናለም ንጉሴ ገለፁ።
የገቢዎች ሚኒስትር ዓይናለም ንጉሴ ባለፉት የለውጥ አመታት የገቢ አሰባሰብ አፈጻጸምን በተመለከተ ማብራሪያ ሰጥተዋል።
በማብራሪያቸውም በሀገር ደረጃ የተያዙ የልማት ዕቅዶችን ተግባራዊ ለማድረግ ዋነኛ አቅም ተደርጎ የሚወሰደው የሀገር ውስጥ ገቢን ማሻሻልና ማሳደግ ነው ብለዋል።
ይህም የህዝብ የልማት ፍላጎትን ደረጃ በደረጃ መመለስ የሚያስችሉ መሰረተ ልማቶችን መገንባት እንደሚያስችል ነው የገለፁት።
ከዚህ አኳያ በገቢ አሰባሰብ ሂደቱ ባለፉት የለውጥ አመታት የገቢ አቅምን ማሻሻል የሚያስችሉ መሰረታዊ ለውጦች መከናወናቸውን ተናግረዋል።
ለአብነትም የፖሊሲና የህግ ማዕቀፎችን ማሻሻልና አገልግሎት አሰጣጡን ማሳለጥ የሚያስችሉ የቴክኖሎጂ አሰራሮችን መዘርጋት መቻሉን አንስተዋል።
የተደረጉት ማሻሻያዎች በገቢ አሰባሰብ ሂደቱ ተጨባጭ ለውጥ ማምጣት ማስቻላቸውንም ተናግረዋል።
በዚህም በ2010 ዓ.ም የፌደራል ገቢ 176 ቢሊዮን ብር እንደነበር አስታውሰው አሁን ላይ በአምስት ወር ብቻ 380 ቢሊዮን ብር ገቢ መሰብሰቡን ተናግረዋል።
እንደ ሀገር የኢኮኖሚ ማሻሻያውን ሊደግፍ የሚችል እና አስተማማኝ የፋይናንስ ምንጭ እንዲኖር የገቢ አሰባሰብ ሂደት ላይ በትኩረት እየተሰራ ነው ብለዋል።
ባለፉት የለውጥ አመታት የኢትዮጵያን የብልፅግና ጉዞ ሊደግፍ የሚችል የሀገር ውስጥ የፋይናንስ አቅም መገንባቱንም አረጋግጠዋል።












