፨ ፨ ፨ ፨ ፨፨ ፨ ፨ ፨ ፨
አዲስ አበባ | ነሐሴ 28 2016| NBC ETHIOPIA- በ2023 ዓ/ም የወባ በሽታን ለማጥፋት በተያዘው ዕቅድ መሰረት ዕቅዱን ተግባራዊ ለማድረግ የሚረዳ ክልል ዓቀፍ የወባ ሳምንት ዘመቻ በባህር ዳር በይፋ ተጀምሯል፡፡
የዘመቻውን መጀመር ይፋ ያደረጉት በምክትል ርዕሰ መስተዳድር ማዕረግ የማሕበራዊ ዘርፍ አስተባባሪ እና የትምህርት ቢሮ ኃላፊ ሙሉነሽ ደሴ (ዶ/ር) በክልሉ የወባ በሽታ ስርጭት ከጊዜ ወደ ጊዜ እየጨመረ መምጣቱን አንስተው ሰማንያ በመቶ የክልሉ አካባቢዎች ለበሽታው ስርጭት አመቺ መሆኑን ጠቁመዋል።
ከመስከረም እስከ ህዳር ያሉ ሶስት ወራቶች ለወባ በሽታ ስርጭት አመቺ የሆኑ ወራቶች መሆናቸውን ጠቁመው ሁሉም ባለድርሻ አካላት በልዩ ትኩረት በመስራት በሽታው በማህበረሰቡ ላይ ሊያደርስ ከሚችለው የከፋ ጉዳት መጠበቅ እንደሚገባ አሳስበዋል።
በመርሃ ግብሩ ላይ የተገኙት የአብክመ ጤና ቢሮ ሃላፊ ክቡር አቶ አብዱልከሪም መንግስቱ በ2017 ዓ/ም በጤናው ሴክተር በትኩረት ከሚሰሩ ዘጠኝ መሰረታዊ ግቦች ውስጥ የወባ በሽታ መከላከልና መቆጣጠር አንዱ መሆኑን ጠቅሰው ባለፉት አምስት ዓመታት የወባ በሽታ ስርጭት ከፍተኛ መሆኑን ተናግረዋል።
በክልሉ በበጀት ዓመቱ 1.5 ሚሊዬን ህዝብ በወባ በሽታ መያዙን የገለጹት ሃላፊው መከላከያ መንገዱን የጠቆሙ ሲሆን የማህበረሰቡን ግንዛቤ በመጨመር፣ ለትንኝ መራቢያ ምቹ የሆኑ ቦታዎችን በማፅዳት፣ ውሃ ያቆሩ ቦታዎችን በማፋሰስና በማዳረቅ፣ ኬሚካሎችን በመርጨትና የአልጋ አጎበሮችን በአግባቡና ዘወትር በመጠቀም መከላከል እንደሚቻል ተናግረዋል።
አጎበሮችን ለአላስፈላጊ አገልግሎቶች ከመጠቀም መቆጠብ ይገባል ያሉት አቶ አብዱልከሪም እንደ ክልል ያለውን የወባ በሽታ ስርጭት ለማስወገድ የሚረዱ ተግባራትን ተኩረት ሰጥቶ በመስራት የህዝብን ጤና መጠበቅ እንደሚገባ መልዕክታቸውን አስተላልፈዋል።

ወባን ለማጥፋት የተሰሩ ውጤታማ ስራዎችን በተሻለ ማስቀጠል እንደሚገባ የጠቀሱት ቢሮ ሃላፊው ወባ ከሚከሰትባቸው ጊዜያት ቀደም ተብሎ የጥንቃቄ ስራዎችን በመስራት ወባን ለማጥፋት መረባረብ ተገቢ መሆኑን አሳስበዋል።
የአማራ ህብረተሰብ ጤና ኢንስቲትዩት ዋና ዳይሬክተር አቶ በላይ በዛብህ በበኩላቸው የወባ በሽታ ትኩረት የሚፈልግ ከመሆኑ ባሻገር ማህበረሰቡ ለወባ መራቢያ ምቹ የሆኑ ቦታዎችን በማጽዳት ራሱን ከበሽታ መጠበቅ እንዳለበት አንስተዋል።

አቶ በላይ አያይዘውም በአማራ ክልል ያለው ወቅታዊ ሁኔታና የመንገዶች መዘጋጋት የወባ ሥራ ቁጥጥርን አዳክሞታል ያሉ ሲሆን ህብረተሰቡ ወባን ለመከላከል ያለው ዝቅተና ግንዛቤና ቸልተኝነት ሌላው ምክንያት እንደሆነ ነው የገለፁት፡፡
“ወባ የማህበረሰብ ችግር እንዳይሆን እናድርግ!” በሚል መሪ ቃል እየተካሄደ በሚገኘው የወባ ሳምንት መርሃ ግብር ላይ የክልል ቢሮ ሃላፊዎች፣ የሃይማኖት አባቶች፣ የዩኒቨርሲቲ ምሁራን፣ አጋር ድርጅቶች እና ጥሪ የተደረገላቸው እንግዶች ተገኝተዋል መረጃው የአማራ ክልል ጠና ቢሮ የህዝብ ግንኙነት ነዉ፡፡
📌YouTube – https://www.youtube.com/@NBCETHIOPIA
📌 TikTok – https://www.tiktok.com/@nbcethiopia
📌Website – https://nbcethiopia.com/news/
📌Telegram-https://t.me/nbcethiopiatv
#NBC_ETHIOPIA
#ሆኖ_መገኘት












