፨ ፨ ፨ ፨ ፨
አዲስ አበባ | ሰኔ 13 2016| NBC ETHIOPIA-የኢ.ፌ.ዴ.ሪ ህዝብ ተወካዮች ምክር ቤት በ33ኛ መደበኛ ስብሰባው የቀረበለትን የ275 ሚሊዮን ዶላር የብድር ስምምነት አፀደቀ።
ምክር ቤቱ በኢትዮጵያ እና በዓለም አቀፍ የልማት ማህበር መካከል ለሁለተኛው የከተሞች የመጠጥ ውሃ አቅርቦት እና ሳኒቴሽን ፕሮጀክት ማስፈጸሚያ የሚውለውን የብድር ስምምነት ከተወያየበት በኋላ በአዋጅ ቁጥር 1335/2016 በሙሉ ድምጽ አፅድቋል፡፡
የብድር ስምምነቱን በማስመልከት በምክር ቤቱ የመንግስት ዋና ተጠሪ ሚኒስትር የተከበሩ ተስፋዬ ቤልጅጌ (ዶ/ር) ማብራሪያ አቀርበዋል፡፡

የተከበሩ ተስፋዬ በልጅጌ (ዶ/ር) በመጠጥ ውሃና ሳኒቴሽን ዘርፍ በተነደፉ ፖሊሲዎች ስትራቴጂዎችና ፕሮግራሞች ውስጥ የንጹህ መጠጥ ውሃ አቅርቦትና ሳኒቴሽን አገልግሎት በስፋትና በጥራት ለማሳደግ ትኩረት ተሰጥቶት እየተሰራበት እንደሚገኝ አሰረድተዋል፡፡
ለሁለተኛው የከተሞች የመጠጥ ውሃ አቅርቦትና ሳኒቴሽን ፕሮግራም ተቀርጾ ባለፉት ዓመታት ተግባራዊ ሲሆን እንደቆየ የተከበሩ ዶክተር ተስፋዬ አስረድተው፤ በብድር ስምምነቱ የተነደፉ ፕሮጀክቶችን ለማጠናቀቅና ያጋጠመውን የበጀት ክፍተት ለመሙላት የተደረገ ተጨማሪ የብድር ስምምነት እንደሆነ አስረድተዋል፡፡
ብድሩም በቀጣይ 3 ዓመታት ተግባራዊ የሚሆንና በጅምር ላይ ያለው የሁለተኛው የከተሞች የመጠጥ ውሃና ሳኒቴሽን ፕሮጀክት ለማጠናከር የሚያግዝ እንደሆነ ሚኒስትሩ አብራርተዋል፡፡
ዶክተር ተስፋዬ አክለውም ብድሩ ከወለድ ነጻ እና ባንኩ በሚወስነው መሰረት ጥቅም ላይ ባልዋለው ብድር ላይ በዓመት እስከ 0.5% የሚደርስ ግዴታ ክፍያ ሊከፈልበት እንደሚችል ገልፀዋል፡፡
ባንኩ የብድሩን ገንዘብ በማስተዳደር ረገድ ለሚሰጠው አገልግሎት እስከ 0.75% የአገልግሎት ክፍያ እንደሚከፈልበት እና ብድሩ የ6 ዓመታት የችሮታ ጊዜን ጨምሮ በ38 ዓመታት ውስጥ ተከፍሎ እንደሚጠናቀቅ ነው ያስረዱት፡፡
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Website – https://nbcethiopia.com/news/
Telegram-https://t.me/nbcethiopiatv












